ഫൈനലിലേക്ക് ആര്? ഫൈനൽ തിരിച്ചുപിടിക്കാൻ പി എസ് ജി, ഉറപ്പിക്കാൻ മാഞ്ചസ്റ്റർ സിറ്റി

യൂറോപ്യന്‍ ഫുട്‌ബോളിലെ ഏറ്റവും ആവേശം നിറഞ്ഞ പോരാട്ടം ഇന്ന് ഇത്തിഹാദില്‍ അരങ്ങേറും. ഈ വര്‍ഷത്തെ ചാമ്പ്യന്‍സ് ലീഗ് സെമിഫൈനല്‍ രണ്ടാംപാദ മത്സരമാണ് സിറ്റിയുടെ തട്ടകത്തില്‍ രാത്രി 12.30ന് നടക്കുന്നത്. ആദ്യപാദത്തില്‍ 2-1 എന്ന സ്കോറിന് ജയിച്ച്‌ എവേ ഗോളിന്റെ മുന്‍തൂക്കം നേടിയ ഇംഗ്ലീഷ് ക്ലബ്ബായ മാഞ്ചസ്റ്റര്‍ സിറ്റി സമനില നേടിയാലും ഫൈനലില്‍ കടക്കും. സിറ്റിയുടെ ഹോം ഗ്രൗണ്ടില്‍ നടക്കുന്ന മത്സരത്തില്‍ വലിയ മാര്‍ജിനില്‍ വിജയം നേടിയാല്‍ മാത്രമേ ഫ്രഞ്ച് ചാമ്പ്യന്‍മാരായ പി എസ്‌ ജിക്ക് ഫൈനല്‍ ഉറപ്പിക്കാനാവൂ. കഴിഞ്ഞ വര്‍ഷം ബയേണിനോട് തോറ്റ് കൈയെത്തും ദൂരത്ത് കിരീടം നഷ്ടപ്പെട്ട പി എസ് ജിക്ക് ഇക്കുറി എന്ത് വില കൊടുത്തും അത് നേടിയെടുക്കുക തന്നെയാകും ലക്ഷ്യം. പെപ്പ് ഗ്വാര്‍ഡിയോളയുടെ ടീമിനെതിരേ ആധികാരിക വിജയം നേടുമെന്നാണ് പി എസ് ജി കോച്ച്‌ പോച്ചിറ്റീനോയുടെ വെല്ലുവിളി.