T20 World Cup| അടുത്ത വർഷം ഇന്ത്യ ശക്തമായി തിരിച്ചുവരും; പുറത്താകലിനെ കുറിച്ച് മുൻ താരങ്ങൾ

സമൂഹ മാധ്യമങ്ങളിൽ ശ്രദ്ധേയ സാന്നിധ്യമായ മുൻ ഇന്ത്യൻ താരവും വെടിക്കെട്ട് ഓപ്പണറുമായ വിരേന്ദർ സെവാഗ് (Virender Sehwag) ടി20 ലോകകപ്പില്‍ നിന്നും ഇന്ത്യയുടെ പുറത്താകലിനെ തമാശരൂപേണയാണ് അവതരിപ്പിച്ചത്. രാഹുല്‍ ഗാന്ധിയുടെ ഫോട്ടോയ്‌ക്കൊപ്പം എല്ലാം അവസാനിച്ചു, ബൈ ബൈ ടാറ്റ ഗുഡ്‌ബൈ എന്നായിരുന്നു സെവാഗ് ട്വീറ്റ് ചെയ്തത്.

സെമി കാണാതെ പുറത്തായ ഇന്ത്യ അടുത്ത വർഷം പൂർവാധികം ശക്തിയോടെ തിരിച്ചുവരുമെന്നാണ് മുൻ ഇന്ത്യൻ താരമായ ഹർഭജൻ സിങ് (Harbhajan Singh) കുറിച്ചത്. ഇന്ത്യയുടെ സാധ്യതകൾ തകർത്ത് അഫ്ഗാനെതിരെ ജയം നേടി സെമിയിൽ പ്രവേശിച്ച ന്യൂസിലൻഡ് ടീമിനെയും ഭജ്ജി അഭിനന്ദിച്ചു. "സെമിയിലെത്തിയ ന്യൂസിലൻഡ് ടീമിന് അഭിനന്ദനങ്ങള്‍, നിങ്ങള്‍ ഇത് അര്‍ഹിക്കുന്നുണ്ട്. കെയ്ന്‍ വില്ല്യംസണ്‍ എത്ര മിടുക്കനാണ്, വൗ... ഈ മനുഷ്യനെയും ന്യൂസിലാന്‍ഡ് ടീമിനെയും ഇഷ്ടപ്പെടുന്നു. ഇന്ത്യക്കു ടൂര്‍ണമെന്റില്‍ ഇനി മുന്നോട്ട് പോവാന്‍ കഴിയില്ലെന്നത് എനിക്കറിയാം, പക്ഷെ അതേകുറിച്ച് വിഷമമില്ല. നമ്മള്‍ കൂടുതല്‍ മെച്ചപ്പെടും, ശക്തമായി തിരിച്ചുവരികയും ചെയ്യു൦ ഭജ്ജി ട്വിറ്ററില്‍ കുറിച്ചു.

ഇന്ത്യന്‍ ടീം ഈ ലോകകപ്പില്‍ അവരുടെ മികവിനൊത്ത പ്രകടനമല്ല പുറത്തെടുത്ത് എന്നും അതിനാലാണ് സെമി കാണാതെ പുറത്തായതെന്നുമായിരുന്നു മുന്‍ ഇന്ത്യൻ ഫാസ്റ്റ് ബൗളര്‍ വെങ്കടേഷ് പ്രസാദിന്റെ (Venkatesh Prasad) ട്വീറ്റ്. "അങ്ങനെ ഒമ്പതു വര്‍ഷങ്ങള്‍ക്കു ശേഷം, തുടര്‍ച്ചയായ ആറ് സെമി ഫൈനല്‍ പ്രവേശനങ്ങൾക്ക് ശേഷം ഇന്ത്യക്കു ഒരു ഐസിസി ടൂര്‍ണമെന്റിന്റെ സെമിയിലെത്താന്‍ കഴിയാതെ വന്നിരിക്കുകയാണ്. ഇന്ത്യ അവരുടെ മികവിനൊത്ത പ്രകടനമല്ല നടത്തിയത്, ഈ പുറത്താകൽ ഇന്ത്യയെ അലട്ടുന്നുണ്ടാകും, ഓസ്‌ട്രേലിയില്‍ അടുത്ത വര്‍ഷം നടക്കാനിരിക്കുന്ന അടുത്ത ടി20 ലോകകപ്പിന് ഒരുങ്ങാന്‍ സമയമായി, അതിൽ ശ്രദ്ധിക്കുക." പ്രസാദ് ട്വീറ്റ് ചെയ്തു.