രവീന്ദ്ര ജഡേജ ഉയർന്ന ഗ്രേഡിന് അർഹൻ; ബിസിസിഐ വാർഷിക കരാറിനെ വിമർശിച്ച് മെക്കൽ വോൺ

ചില കളിക്കാർ ലിസ്റ്റിൽ നിന്നു പുറത്തായെങ്കിലും കുൽദീപ് യാദവ്, യുസ്വെന്ദ്ര ചഹൽ, രവീന്ദ്ര ജഡേജ എന്നിവരുടെ കരാർ ഗ്രേഡ് സംബന്ധിച്ച് ചർച്ചകൾ ഉയർന്നിരുന്നു. ഇപ്പോഴിതാ ജഡേജയെ ഉയർന്ന ഗ്രേഡിലേക്ക് പരിഗണിക്കാതിരുന്ന ബിസിസിഐ നടപടിയെ വിമർശിച്ച് രംഗത്തെത്തിയിരിക്കുകയാണ് മുൻ ഇംഗ്ലണ്ട് ക്യാപ്റ്റൻ മൈക്കൽ വോൺ. ട്വിറ്ററിലൂടെയായിരുന്നു അദ്ദേഹത്തിന്റെ പ്രതികരണം. ക്രിക്കറ്റിലെ പല കാര്യങ്ങളിലും തൻ്റെ അഭിപ്രായം വെട്ടി തുറന്ന് പറയുന്ന ഒരാളാണ് വോൺ. ഈ നടപടിയെ അപകീർത്തികരമെന്ന് വിശേഷിപ്പിച്ച വോൺ, വിരാട് കോലിക്ക് ശേഷം ടീമിലെ വലിയ താരമാണ് ജഡേജയെന്നും കൂട്ടിച്ചേർത്തു.

മൂന്ന് ഫോർമറ്റുകളിലും ഇന്ത്യൻ നിരയിലെ സജീവ സാന്നിധ്യമാണ് ജഡേജ. ഇന്ത്യൻ ടീമിൽ താരം വഹിക്കുന്ന പങ്ക് വളരെ നിർണായകമാണ്. ടീമിനായി ബാറ്റിങ്ങിലും ബോളിങ്ങിലും ഫീൽഡിങ്ങിലും മികച്ച പ്രകടനം പുറത്തെടുക്കുന്ന താരം കൂടിയാണ് അദ്ദേഹം. ഇന്ത്യക്കായി പല നിർണായക മത്സരങ്ങൾ താരം ഒറ്റക്ക് നിന്ന് ജയിപ്പിച്ചിട്ടുമുണ്ട്.

അതേസമയം മൈക്കൽ വോണിന് പിന്നാലെ മുൻ ഇന്ത്യൻ സെലക്ടർ എംഎസ്കെ പ്രസാദും ജഡേജയ്ക്ക് ഉയർന്ന ഗ്രേഡിലേക്ക് സ്ഥാനക്കയറ്റം നൽകാത്തതിനെ വിമർശിച്ച് രംഗത്തെത്തിയിരുന്നു. എ പ്ലസ് വിഭാഗത്തിലേക്ക് ജഡേജ അർഹനാണെന്ന് പറഞ്ഞ അദ്ദേഹം ആ വിഭാഗത്തിൽ ജഡേജയുടെ പേര് ഉൾപ്പെടുത്താതിരിക്കാൻ കാരണമൊന്നും താൻ കാണുന്നില്ലെന്നും കൂട്ടിച്ചേർത്തു.

Summary: Michael Vaughan unhappy with Ravindra Jadeja's BCCI contract, says that he deserves to. be in the A plus grade of the contract.