അന്താരാഷ്ട്ര ഒളിംപിക് കമ്മിറ്റി സമ്മേളനം ചേരുന്നത് എന്തിന്? വോട്ടിംഗ് നിയമങ്ങൾ എന്തൊക്കെ?

ഈ വര്‍ഷത്തെ അന്താരാഷ്ട്ര ഒളിപിക് കമ്മിറ്റി (ഐഒസി)യുടെ സമ്മേളനം ഒക്ടോബര്‍ 15 മുതല്‍ 17 വരെ മുംബൈയില്‍ വെച്ച് നടത്തപ്പെടുകയാണ്. 40 വര്‍ഷത്തിന് ശേഷമാണ് ഐഒസി സമ്മേളനം ഇന്ത്യയില്‍ നടക്കുന്നതെന്നതും പ്രത്യേകതയാണ്. ഒളിംപിക് മത്സരങ്ങളുടെ നടത്തിപ്പും ഒളിംപിക് പ്രസ്ഥാനത്തെ നിയന്ത്രിക്കുന്നതിനുള്ള നിയമങ്ങളും മാര്‍ഗനിര്‍ദേശങ്ങളും അടങ്ങിയ ഒളിംപിക് ചാര്‍ട്ടറില്‍ മാറ്റം വരുത്തുകയും പരിഷ്‌കരിക്കുകയും അംഗീകരിക്കുകയും ചെയ്യുന്നത് ഐഒസി സമ്മേളനത്തിലാണ്. ഈ തീരുമാനങ്ങള്‍ അന്തിമമാണ്. ചാര്‍ട്ടര്‍ അംഗീകരിക്കുകയോ ഭേദഗതി ചെയ്യുകയോ ചെയ്യുക, ഐഒസി അംഗങ്ങളുടെയും ഭാരവാഹികളുടെയും തിരഞ്ഞെടുപ്പ്, ഒളിംപിക്സിന്റെ ആതിഥേയ നഗരത്തിന്റെ തിരഞ്ഞെടുപ്പ് എന്നിവ ഉള്‍പ്പെടെ ആഗോള ഒളിംപിക്സ് പ്രസ്ഥാനത്തിന്റെ പ്രധാന പ്രവര്‍ത്തനങ്ങളെക്കുറിച്ച് ഇത് ചര്‍ച്ച ചെയ്യുകയും തീരുമാനമെടുക്കുകയും ചെയ്യുന്നു.