തിരിച്ചടിച്ച് ഇറാൻ; ജെറുസലേമിലും ടെൽ അവീവിലും മിസൈൽ ആക്രമണം

പൊതുജനങ്ങളോട് അഭയം തേടാൻ അധികൃതർ ആഹ്വാനം ചെയ്തതോടെ ഇസ്രായേലിലുടനീളം വ്യോമാക്രമണ സൈറണുകൾ മുഴങ്ങി. ടെൽ അവീവിന്റെ ആകാശരേഖയിൽ മിസൈലുകൾ കാണപ്പെട്ടു, ഇറാൻ രണ്ട് സാൽവോകൾ പ്രയോഗിച്ചതായി സൈന്യം പറഞ്ഞു.

ഇറാൻ 100 ൽ താഴെ മിസൈലുകൾ മാത്രമാണ് പ്രയോഗിച്ചതെന്നും അവയിൽ മിക്കതും തടയുകയോ പരാജയപ്പെടുകയോ ചെയ്തതായും ഇസ്രായേൽ സൈന്യം. ഇസ്രായേലിലേക്ക് പറന്ന ഇറാനിയൻ മിസൈലുകൾ വെടിവച്ചുവീഴ്ത്താൻ യുഎസ് സൈന്യം സഹായിച്ചതായി രണ്ട് യുഎസ് ഉദ്യോഗസ്ഥർ പറഞ്ഞു. രണ്ട് പേർക്ക് ഗുരുതര പരിക്കേറ്റതായും എട്ട് പേർക്ക് മിതമായ പരിക്കും 34 പേർക്ക് നേരിയ പരിക്കേറ്റതായും ഇസ്രായേലിന്റെ ചാനൽ 12 പറഞ്ഞു.

ആക്രമണത്തിൽ ടെൽ അവീവിനടുത്തുള്ള റാമത് ഗാനിലെ ഒരു റെസിഡൻഷ്യൽ ഏരിയയിലെ അപ്പാർട്ട്മെന്റ് ബ്ലോക്ക് ഉൾപ്പെടെ നിരവധി കെട്ടിടങ്ങൾ തകർന്നു. സെൻട്രൽ ടെൽ അവീവിലെ മറ്റൊരു കെട്ടിടവും തകർന്നു, ഒന്നിലധികം നിലകൾക്ക് കാര്യമായ നാശനഷ്ടമുണ്ടായി.

ഇറാനിൽ ദിവസം മുഴുവൻ ഇസ്രായേൽ നടത്തിയ ആക്രമണങ്ങളും ഇറാനിയൻ പ്രതികാര നടപടികളും വിശാലമായ ഒരു പ്രാദേശിക സംഘർഷത്തെക്കുറിച്ചുള്ള ഭയപ്പാട് സൃഷ്‌ടിച്ചിരുന്നു.

ഇറാന്റെ ബൃഹത്തായ ഭൂഗർഭ ആണവ കേന്ദ്രം ഇസ്രായേൽ തകർത്ത് ഉന്നത സൈനിക കമാൻഡർമാരെ കൊലപ്പെടുത്തിയതിന് ശേഷം, ടെഹ്‌റാൻ ഇസ്രായേലിന് നേരെ നൂറുകണക്കിന് ബാലിസ്റ്റിക് മിസൈലുകൾ വിക്ഷേപിച്ചതായി ഇറാൻ സ്റ്റേറ്റ് ന്യൂസ് ഏജൻസി ഐആർഎൻഎ അറിയിച്ചു. തങ്ങളുടെ ആണവ പദ്ധതി സമാധാനപരമായ ആവശ്യങ്ങൾക്ക് മാത്രമാണെന്ന് ഇറാൻ അവകാശപ്പെടുന്നു.

നതാൻസിലുണ്ടായ നാശനഷ്ടങ്ങളുടെ വ്യാപ്തി വ്യക്തമാകാൻ കുറച്ച് സമയമെടുക്കുമെന്ന് ഇസ്രായേലി ഉദ്യോഗസ്ഥർ പറഞ്ഞു. സിവിലിയൻ ഉപയോഗത്തിന് പകരം ബോംബിന് അനുയോജ്യമായ അളവിൽ ഇറാൻ അവിടെ യുറേനിയം ശുദ്ധീകരിക്കുന്നുണ്ടെന്ന് പാശ്ചാത്യ രാജ്യങ്ങൾ പണ്ടേ ആരോപിച്ചിരുന്നു.

നതാൻസിൽ ഭൂമിക്കു മുകളിലുള്ള പൈലറ്റ് സമ്പുഷ്ടീകരണ പ്ലാന്റ് നശിപ്പിക്കപ്പെട്ടുവെന്ന് യുഎൻ ആണവ നിരീക്ഷണ മേധാവി റാഫേൽ ഗ്രോസി വെള്ളിയാഴ്ച സുരക്ഷാ കൗൺസിലിനെ അറിയിച്ചു. ഫോർഡോ ഇന്ധന സമ്പുഷ്ടീകരണ പ്ലാന്റിലും ഇസ്ഫഹാനിലുമുള്ള മറ്റ് രണ്ട് സൗകര്യങ്ങൾക്കു നേരെയുള്ള ഇസ്രായേലിന്റെ ആക്രമണങ്ങളെക്കുറിച്ചുള്ള വിവരങ്ങൾ യുഎൻ ഇപ്പോഴും ശേഖരിച്ചുകൊണ്ടിരിക്കുകയാണെന്ന് അദ്ദേഹം പറഞ്ഞു.

ഇസ്രായേൽ ഒരു യുദ്ധം ആരംഭിച്ചതായി ഇറാന്റെ പരമോന്നത നേതാവ് ആയത്തുള്ള അലി ഖമേനി ആരോപിച്ചു. ഇസ്രായേലിൽ ഒരിടത്തും സുരക്ഷിതമായിരിക്കില്ലെന്നും പ്രതികാരം വേദനാജനകമാണെന്നും ഒരു മുതിർന്ന ഇറാനിയൻ ഉദ്യോഗസ്ഥൻ പറഞ്ഞു.

ഇറാനിൽ ഇസ്രായേൽ നടത്തിയ ആക്രമണങ്ങളിൽ മുതിർന്ന സൈനിക ഉദ്യോഗസ്ഥർ ഉൾപ്പെടെ 78 പേർ കൊല്ലപ്പെടുകയും 320 ലധികം പേർക്ക് പരിക്കേൽക്കുകയും ചെയ്തുവെന്ന് ഇറാന്റെ ഐക്യരാഷ്ട്രസഭ പ്രതിനിധി അമീർ സയീദ് ഇറവാനി പറഞ്ഞു, അവരിൽ ഭൂരിഭാഗവും സാധാരണക്കാരാണ്.

ആക്രമണങ്ങളിൽ അമേരിക്ക പങ്കാളികളാണെന്ന് അദ്ദേഹം ആരോപിച്ചു, അനന്തരഫലങ്ങളുടെ പൂർണ ഉത്തരവാദിത്തം അവർ വഹിക്കുന്നുവെന്നും അദ്ദേഹം പറഞ്ഞു.