'എന്‍റെ കൃഷ്ണൻ ജനിച്ച സ്ഥലം മഥുര! അതൊരു പറഞ്ഞറിയിക്കാൻ കഴിയാത്ത അനുഭവമായിരുന്നു'; നവ്യാ നായര്‍ കൃഷ്ണ ജന്മഭൂമിയില്‍

നന്ദനത്തിലെ ബാലാമണിയായി മലയാളികളുടെ മനസില്‍ ഇടംനേടിയ അഭിനേത്രിയാണ് നവ്യാ നായര്‍. അടിമുടി കൃഷ്ണ ഭക്തകൂടിയായ നവ്യ ഗുരുവായൂര്‍ അടക്കമുള്ള ക്ഷേത്രങ്ങളില്‍ ദര്‍ശനം നടത്താനും നൃത്തം അവതരിപ്പിക്കാനും അടിക്കടി പോകാറുമുണ്ട്.

നന്ദനത്തിലെ കാര്‍മുകില്‍ വര്‍ണന്‍റെ ചുണ്ടില്‍ എന്ന ചിത്ര ആലപിച്ച ഗാനം സ്ക്രീനില്‍ അവതരിപ്പിച്ച് നവ്യ നേടിയ കൈയ്യടി ചെറുതൊന്നുമല്ല. പിന്നീടങ്ങോട്ട് നവ്യയുടെ ജീവിതത്തിന്‍റെ അവിഭാജ്യ ഘടകമായി കൃഷ്ണ ഭഗവാന്‍ മാറുകയും ചെയ്തു.

വിവാഹവേളയില്‍ മണ്ഡപത്തില്‍ പ്രത്യേകമായി ഒരുക്കിയ കൃഷ്ണ വിഗ്രഹത്തിന്‍റെ മുന്‍പിലായിരുന്നു നവ്യയുടെ താലികെട്ട്. കുറച്ച് കാലം സിനിമയില്‍ നിന്ന് വിട്ടുനിന്നെങ്കിലും ഇപ്പോള്‍ ഇന്‍ഡസ്ട്രിയില്‍ സജീവമാണ് താരം.

കടുത്ത കൃഷ്ണ ഭക്തയായ നവ്യ അടുത്തിടെ ഉത്തര്‍പ്രദേശിലെ മഥുരയില്‍ സ്ഥിതിചെയ്യുന്ന കൃഷ്ണജന്മഭൂമി ക്ഷേത്രം സന്ദര്‍ശിച്ചിരിന്നു. ദര്‍ശനം നടത്തിയപ്പോള്‍ ഉണ്ടായ അനുഭവം, താരം ഇന്‍സ്റ്റഗ്രാമിലൂടെ പങ്കുവെക്കുകയും ചെയ്തു. 

എന്റെ കൃഷ്ണൻ ജനിച്ച സ്ഥലം മഥുര !!! അതൊരു പറഞ്ഞറിയിക്കാൻ കഴിയാത്ത സന്തോഷവും നിർവൃത്തിയും തരുന്ന അനുഭവമായി .. അമ്പലം അടക്കാൻ 10 മിനിറ്റ് മാത്രം ബാക്കി ഉള്ളപ്പോൾ എത്തി .. ബാഗ് മൊബൈൽ ഒക്കെ ക്ലോക്ക് റൂമിൽ വെക്കണം.

സത്യത്തിൽ ആ പയ്യൻ സഹായിച്ചില്ലെങ്കിൽ വൈകിട്ട് 4 മണിക്ക് മാത്രമേ ദർശനം കിട്ടുമായിരുന്നുള്ളൂ .. എല്ലാം ഭഗവാന്റെ ലീലകൾ .. നാരായണായ നമ: പിന്നെ ഇവിടെ എല്ലാവരും കൃഷ്ണ കൃഷ്ണ അല്ല മറിച്ച് രാധെ രാധെ എന്നാണ്.. ഞാനും ഏറ്റു വിളിച്ചു രാധെ രാധെ ..

ക്ഷേത്രത്തിനകത്ത് ഫോണ്‍ കയറ്റാന്‍ അനുവാദമില്ലാത്തതിനാല്‍ വീഡിയോ എടുക്കാന്‍ സാധിച്ചില്ലെന്ന പരിഭവവും നവ്യ പങ്കുവെച്ചു. ഇടവേളയ്ക്ക് ശേഷം സിനിമയിലേക്ക് മടങ്ങിയെത്തിയ നവ്യ ഒരുത്തീ, ജാനകി ജാനേ എന്നി സിനിമകളിലൂടെ നായികയായെത്തി. റിയാലിറ്റി ഷോകളില്‍ വിധികര്‍ത്താവായും താരം എത്തുന്നുണ്ട്.