'കറുത്തവളാണ്, വണ്ണം കൂടിയ പെണ്‍കുട്ടി'; തുടക്കകാലത്ത് അധിക്ഷേപം നേരിട്ടിരുന്നതായി കജോള്‍

സിനിമാ മേഖലയിലെ തുടക്കകാലത്ത്  ബോഡി ഷെയ്മിങ് അധിക്ഷേപങ്ങളെല്ലാം കേട്ടിട്ടുണ്ടായിരുന്നതായി ബോളിവുഡ് നടി കാജോള്‍. ഹ്യുമന്‍സ് ഓഫ് ബോംബെയുടെ സോഷ്യല്‍ മീഡിയ പേജിലൂടെയാണ് കാജോള്‍ തന്റെ അനുഭവം പങ്കുവച്ചത്.

'അവള്‍ കറുത്തവളാണ്. എപ്പോഴും കണ്ണട ഉപയോഗിക്കുന്നു. വണ്ണം കൂടിയ പെണ്‍കുട്ടിയാണ്' എന്നിങ്ങനെയുള്ള ബോഡി ഷെയിമിങ് വാക്കുകള്‍ കേട്ടിരുന്നതായി നടി പറയുന്നു.

'ഞാന്‍ അതേ പറ്റി കൂടുതല്‍ ചിന്തിച്ചിരുന്നില്ല. എന്റെ നെഗറ്റീവുകള്‍ പറയുന്ന എല്ലാവരെക്കാളും മികച്ചതാണ് ഞാനെന്ന് എനിക്ക് അറിയാമായിരുന്നു. അതുകൊണ്ടു തന്നെ ഞാന്‍ എന്റെ പാതയിലൂടെ സഞ്ചരിച്ചു. എനിക്ക് പരാജയങ്ങളേക്കാള്‍ കൂടുതല്‍ ഹിറ്റുകളായിരുന്നു ഉണ്ടായിരുന്നത്'' കജോള്‍ പറഞ്ഞു.

ബോഡി ഷെയിമിങ് ആദ്യമൊക്കെ വേദനിപ്പിച്ചവെന്നും ഇരുണ്ട നിറമാണെങ്കിലും ഭംഗിയുള്ള പെണ്‍കുട്ടിയാണെന്ന് ഞാനെന്ന് വിശ്വസിക്കാന്‍ പാടുപെട്ടിരുന്നു എന്നും കജോള്‍ പറയുന്നു. ഒടുവില്‍ സമയമെടുത്തിട്ടാണെങ്കിലും കളിയാക്കലുംബോഡി ഷെയിമിങും തന്നെ വേദനിപ്പിക്കാന്‍ കഴിയില്ലെന്ന് തിരിച്ചറിഞ്ഞുവെന്നാണ് കജോള്‍ പറയുന്നത്.

17-ാം വയസിലാണ് കാജോള്‍ നായികയായി എത്തുന്നത്. 'കുച്ച് കുച്ച് ഹോതാ ഹേ', 'ബാസീഗര്‍', 'കഭി ഖുശി കഭി ഖം', തുടങ്ങി ഒരു കാലത്ത് പ്രേക്ഷകര്‍ നെഞ്ചേറ്റിയ ചിത്രങ്ങളിലെ നായികയായിരുന്ന കജോള്‍ സിനിമാപ്രേമികള്‍ക്ക് ഇന്നും പ്രിയപ്പെട്ട താരമാണ്,

നടന്‍ അജയ് ദേവ്ഗനുമായുള്ള വിവാഹത്തിന് ശേഷവും അഭിനയത്തില്‍ സജീവമായ കജോള്‍ തന്റെ കുടുംബവിശേഷങ്ങള്‍ മിക്കപ്പോഴും സോഷ്യല്‍ മീഡിയയിലൂടെ ആരാധകര്‍ക്കായി പങ്കുവയ്ക്കാറുണ്ട്.