റിയാദിലെ ആശുപത്രിയിൽ മകൾക്കൊപ്പം ക്രിസ്റ്റ്യാനോ റൊണാൾഡോ; എന്താ കാരണമെന്ന് ആരാധകർ

റിയാദിൽ മകൾക്കൊപ്പം ആശുപത്രിയിൽ നിൽക്കുന്ന അൽ നസറിന്റെ പോർച്ചുഗൽ സൂപ്പർതാരം ക്രിസ്റ്റ്യാനോ റൊണാൾഡോയുടെ ചിത്രങ്ങൾ പുറത്ത്.

റൊണാൾഡോയ്ക്കൊപ്പം പങ്കാളി ജോർജീന റോഡ്രിഗസും ആശുപത്രിയിലുണ്ട്. മകള‍ുടെ ചികിത്സയ്ക്കായാണ് ഇരുവരും ആശുപത്രിയിൽ എത്തിയത്. ചിത്രം പുറത്തുവന്നതോടെ മകൾക്ക് എന്തു പറ്റിയെന്ന ആശങ്ക പങ്കുവെച്ച് ആരാധകരും എത്തി.

എന്നാൽ, ആശങ്കപ്പെടേണ്ട സാഹചര്യമില്ലെന്നും അപ്പെൻഡിസൈറ്റിസ് ഓപ്പറേഷനു വേണ്ടിയാണ് റൊണാൾഡോയുടെ മകളെ ആശുപത്രിയിൽ പ്രവേശിപ്പിച്ചതെന്നുമാണ് റിപ്പോർട്ടുകൾ. റിയാദിലെ ഏത് ആശുപത്രിയിലാണ് റൊണാൾഡോയുടെ മകളെ പ്രവേശിപ്പിച്ചതെന്ന് വ്യക്തമല്ല.

മകൾ എത്രയും വേഗം സുഖം പ്രാപിക്കട്ടെയെന്ന് ട്വിറ്ററിൽ ഫോട്ടോ പങ്കുവെച്ച് ആരാധകർ പറയുന്നുണ്ട്. അഞ്ച് കുട്ടികളാണ് റൊണാൾഡോയ്ക്കുള്ളത്. 2010 ലാണ് റൊണാൾഡോയുടെ മൂത്തമകൻ ജനിച്ചത്. മകന്റെ പൂർണ സംരക്ഷണ അവകാശം റൊണാൾഡോയ്ക്ക് ആയതിനാൽ മാതാവ് ആരാണെന്ന് വെളിപ്പെടുത്തിയിട്ടില്ല.

ക്രിസ്റ്റ്യാനോ അൽ നസറിലേക്ക് മാറിയപ്പോൾ ജോർജീനയും മക്കളും താരത്തിനൊപ്പം റിയാദിലേക്ക് താമസം മാറിയിരുന്നു. 

2016 മുതൽ റൊണാൾഡോയും ജോർജിനയും തമ്മിൽ പ്രണയത്തിലാണ്. റൊണാൾഡോ റയലിൽ കളിച്ചിരുന്ന കാലത്ത് മാഡ്രിഡിൽ വെച്ച് ഇരുവരും കണ്ടുമുട്ടുകയും പിന്നീട് പ്രണയത്തിലാവുകയുമായിരുന്നു.