Kareena Kapoor| 44-ാം വയസ്സിലും സുന്ദരി; കരീന കപൂറിന്റെ ഫിറ്റ്നസ് രഹസ്യം അറിയുമോ?

പ്രായം 40-കഴിഞ്ഞിട്ടും ഇപ്പോഴും ബോളിവുഡിലെ സുന്ദരിയാണ് കരീന കപൂർ (Kareena Kapoor). ഇപ്പോഴും താരറാണിയെന്ന കരീനയുടെ പട്ടത്തിന് യാതൊരു കോട്ടവും തട്ടാത്ത രീതിയിലാണ് നടിയുടെ സൗന്ദര്യം. ഈ പ്രായത്തിലും സൗന്ദര്യം ഇങ്ങനെ നിലനിർത്തുന്നതിനെ കുറിച്ച് അടുത്തിടെ ഒരു അഭിമുഖത്തിൽ നടി സംസാരിച്ചിരുന്നു.

ആരോ​ഗ്യത്തിന് കൂടുതൽ ശ്രദ്ധ കേന്ദ്രീകരിച്ച് വിട്ടുവീഴ്ചയില്ലാത്ത ദിനചര്യയാണ് കരീനയുടെ ഫിറ്റ്നസ് രഹസ്യം. തന്റെ പുതിയ ഉറക്ക, വ്യായാമ ദിനചര്യകൾ വെളിപ്പെടുത്തിയിരിക്കുകയാണ് നടി. നോഡ് മാസികയ്ക്ക് നൽകിയ അഭിമുഖത്തിലാണ് കരിയർ, വ്യക്തിജീവിതം, ഫിറ്റ്നസ് എന്നിവയെക്കുറിച്ച് നടി വെളിപ്പെടുത്തിയിരിക്കുന്നത്.

അഭിമുഖത്തിൽ തന്റെ ദിനചര്യയെകുറിച്ചാണ് 44-കാരിയായ കരീന സംസാരിക്കുന്നത്. വ്യായാമത്തിന് താൻ വളരെയധികം പ്രാധാന്യം നൽകുന്നുണ്ടെന്നാണ് കരീന പറഞ്ഞത്. രണ്ട് കുട്ടികളുടെ അമ്മയായതിനുശേഷം തന്റെ ദിനചര്യയിൽ എന്തൊക്കെ മാറ്റങ്ങൾ വരുത്തിയെന്നും കരീന വ്യക്തമാക്കുന്നുണ്ട്. ഇതിൽ പ്രധാനപ്പെട്ടത് അതിരാവിലെ ഉറക്കമെഴുന്നേൽക്കുന്നതും നേരത്തെ ഉറങ്ങുന്നതുമാണ്.

വൈകുന്നേരം 6 മണിക്ക് അത്താഴം കഴിക്കുമെന്നാണ് നടി പറയുന്നത്. 9:30-ഓടെ ഉറങ്ങാൻ കിടക്കും. അതിരാവിലെ എഴുന്നേറ്റ് വർക്കൗട്ട് തുടങ്ങുമെന്നും നടി പറഞ്ഞു. പാർട്ടികളിലൊന്നും തന്നെ പ്രതീക്ഷിക്കേണ്ടെന്നും ഇതിനെ കുറിച്ച് തന്റെ സുഹൃത്തുക്കൾക്ക് അറിയാമെന്നും അവർ അതിനെ ബഹുമാനിക്കുന്നുണ്ടെന്നും കരീന വ്യക്തമാക്കി.

വ്യായാമം ചെയ്യുന്നതിൽ യാതൊരു വിട്ടുവീഴ്ചയും ഇല്ലെന്നാണ് കരീന പറയുന്നത്. മാനസികാവസ്ഥ മെച്ചപ്പെടുത്താനും ഫിറ്റ്നസ് നിലനിർത്താനും വ്യായാമം ഏറെ സഹായിക്കും. കോവിഡിന് ശേഷമാണ് ഫിറ്റ്നസ് എത്ര പ്രധാനമാണെന്ന് താൻ മനസിലാക്കിയതെന്നും കരീന അഭിമുഖത്തിൽ കൂട്ടിച്ചേർത്തു.

നേരത്തെയുള്ള അത്താഴവും കൃത്യ സമയത്തെ ഉറക്കവും മികച്ച ദഹനം നൽകുകയും, ഹോർമോൺ സന്തുലിതാവസ്ഥ, ആരോ​ഗ്യം ഇവയെയൊക്കെ മെച്ചപ്പെടുത്തുന്നു. എങ്കിൽ പോലും ഓരോ വ്യക്തികളുടെയും ആ​രോ​ഗ്യാവസ്ഥ കണക്കിലെടുത്ത് വേണം ഇത്തരത്തിലുള്ള ഡയറ്റുകൾ പിന്തുടരാൻ.