Malaika Arora|നാല് വർഷത്തെ പ്രണയകാലം അവസാനിച്ചു; മലൈക അറോറയും അർജുൻ കപൂറും വേർപിരിഞ്ഞു?

ബോളിവുഡിലെ താരജോഡികളാണ് മലൈക അറോറയും അർജുൻ കപൂറും. നാല് വർഷമായി പ്രണയത്തിലായിരുന്ന ഇരുവരും ഒടുവിൽ തങ്ങളുടെ ബന്ധം അവസാനിപ്പിക്കാൻ തീരുമാനിച്ചു എന്ന വാർത്തയാണ് ഏറ്റവും പുതിയത്.

ഇരുവരും ഡേറ്റിങ്ങിലാണെന്ന വാർത്ത ആദ്യം പുറത്തു വന്നതുമുതൽ പാപ്പരാസികൾ രണ്ടു പേർക്കും പിന്നാലെയായിരുന്നു. മലൈകയും അർജുനും ഇൻസ്റ്റഗ്രാമിലൂടെ ഒന്നിച്ചുള്ള ചിത്രങ്ങളും പങ്കുവെച്ചിരുന്നു.

ബോളിവുഡ് ലൈഫ് ഡോട്ട്കോമാണ് മലൈകയും അർജുനും വേർപിരിയുന്നതായി റിപ്പോർട്ട് ചെയ്തിരിക്കുന്നത്. അർജുനുമായി പിരിഞ്ഞതിനു ശേഷം മലൈക കടുത്ത മാനസിക വിഷമത്തിലാണെന്നാണ് റിപ്പോർട്ടുകൾ.

ആറ് ദിവസമായി മലൈക വീട്ടിൽ നിന്നും പുറത്തിറങ്ങിയിട്ട്. മറ്റുള്ളവരിൽ നിന്ന് മാറി ഒറ്റയ്ക്ക് കഴിയുകയാണ് മലൈക ഇപ്പോൾ. ബ്രേക്ക് അപ്പിൽ മലൈക മാനസികമായി തകർന്നിരിക്കുകയാണെന്നും അൽപനാൾ പുറംലോകവുമായി ബന്ധമില്ലാതെ കഴിയാനാണ് അവർ ആഗ്രഹിക്കുന്നത്.

ഈ ദിവസങ്ങളിൽ അർജുൻ കപൂർ മലൈകയുടെ വീട്ടിൽ എത്തിയിട്ടില്ല. അർജുൻ കപൂറിന്റെ സഹോദരി റിയ കപൂറിന്റെ അയൽവാസിയാണ് മലൈക അറോറ. മൂന്ന് ദിവസം മുമ്പ് സഹോദരിയുടെ വീട്ടിൽ എത്തിയിട്ടും അർജുൻ കപൂർ മലൈകയെ കാണാൻ പോയില്ലെന്നാണ് റിപ്പോർട്ടിൽ പറയുന്നത്.

അർജുൻ കപൂറിന്റെ കുടുംബത്തിനൊപ്പം മലൈകയും സ്ഥിര സാന്നിധ്യമായിരുന്നു. അടുത്തിടെയുള്ള ദിവസങ്ങളിൽ ഇത്തരം ചടങ്ങുകളിൽ നിന്ന് മലൈക വിട്ടു നിൽക്കുന്നത് ഇരവരും പിരിഞ്ഞതിനാലാണെന്നാണ് റിപ്പോർട്ടുകൾ.

ഏതാനും നാൾ മുമ്പ് ഇരുവരും വേർപിരിഞ്ഞതായുള്ള വാർത്തകൾ വന്നിരുന്നു. ഒന്നിച്ചുള്ള ചിത്രം ഇൻസ്റ്റഗ്രാമിൽ പങ്കുവെച്ചായിരുന്നു ഇരുവരും ഈ ഗോസിപ്പുകൾ അവസാനിപ്പിച്ചത്. പുതിയ വാർത്തകളോട് ഇരുവരും ഇതുവരെ പ്രതികരിച്ചിട്ടില്ല.

2019 ലാണ് പ്രണയത്തിലാണെന്ന് മലൈകയും അർജുനും ആദ്യമായി തുറന്നു പറയുന്നത്. സൽമാൻ ഖാന്റെ സഹോദരൻ അർബാസ് ഖാനുമായുള്ള വിവാഹം 2016 ൽ വേർപെടുത്തിയതിനു ശേഷമായിരുന്നു മലൈക അർജുനുമായി അടുത്തത്. 1998 ലായിരുന്നു മലൈകയും അർബാസ് ഖാനും വിവാഹിതരായത്.

മലൈകയും അർജുനും തമ്മിലുള്ള പ്രായവ്യത്യാസത്തിന്റെ പേരിൽ ഇരുവരും നിരവധി ട്രോളുകൾക്ക് ഇരയായിരുന്നു. അർജുൻ കപൂറിന് 36 വയസ്സും മലൈകയ്ക്ക് 48 വയസ്സുമാണ് പ്രായം.