സമാന്തയുമായി പിരിഞ്ഞ നാഗ ചൈതന്യ ദുൽഖറിന്റെ നായികയെ വിവാഹനിശ്ചയം നടത്തും; ചിത്രം പുറത്തുവിടുമെന്ന് സൂചന

നടൻ നാഗ ചൈതന്യ (Naga Chaitanya) മുൻഭാര്യയായിരുന്ന സമാന്ത റൂത്ത് പ്രഭുവുമായി വേർപിരിഞ്ഞ് രണ്ടര വർഷങ്ങൾക്ക് ശേഷം വീണ്ടും വിവാഹിതനാകാൻ പോകുന്നു എന്ന് റിപ്പോർട്ട്. കുറച്ചു കാലമായി നടന്റെ പ്രണയ വാർത്ത ഗോസിപ് കോളങ്ങളിൽ നിറഞ്ഞിരുന്നു. വിദേശത്തും മറ്റുമായി താരം നടൻ ദുൽഖർ സൽമാന്റെ നായികയായിരുന്ന നടിയുമായി അവധിയാഘോഷിക്കുന്നു എന്നും വിവരം പുറത്തുവന്നു

വിവാഹം ചെയ്യാൻ പോകുന്നതും ഇതേ താരത്തെ തന്നെയാണ് എന്നാണ് വിവരം. ഇന്നായിരിക്കും വളരെ വേണ്ടപ്പെട്ടവർ മാത്രം പങ്കെടുക്കുന്ന വിവാഹ നിശ്ചയ ചടങ്ങുകൾ നടക്കുകയത്രേ. ചൈതന്യയുടെ പിതാവ് നാഗാർജുനയാകും വിവാഹനിശ്ചയ ചിത്രം പുറത്തുവിടുക എന്നും വിവരമുണ്ട് (തുടർന്ന് വായിക്കുക)

'ഗ്രേറ്റ് ആന്ധ്ര'യാണ് ഈ വാർത്ത പുറത്തുവിട്ടത്. വിശ്വസനീയമായ ഉറവിടങ്ങളിൽ നിന്നും വാർത്ത സ്ഥിരീകരിച്ചതായി ഈ റിപ്പോർട്ടിൽ പറയുന്നു. 2021ലായിരുന്നു നാഗ ചൈതന്യ സമാന്തയുമായുള്ള നാല് വർഷത്തെ വിവാഹജീവിതം അവസാനിപ്പിച്ചത്

നടി ശോഭിത ദുലിപാലയെയാണ് നാഗ ചൈതന്യ വിവാഹം ചെയ്യാൻ പോകുന്നത് എന്നാണ് റിപ്പോർട്ട്. ഇവരുടെ പ്രണയവാർത്തകൾ വന്നിരുന്നുവെങ്കിലും, ശോഭിതയോ നാഗ ചൈതന്യയോ അക്കാര്യം സ്ഥിരീകരിച്ചിരുന്നില്ല

'കുറുപ്പ്' സിനിമയിൽ ദുൽഖറിന്റെ നായികയായ ശോഭിത, മണിരത്നത്തിന്റെ 'പൊന്നിയിൻ സെൽവനിലും' അഭിനയിച്ചിരുന്നു. ജൂൺ മാസത്തിൽ ഇരുവരും ചേർന്ന് യൂറോപ്പ് സന്ദർശനം നടത്തിയിരുന്നു. ഇവിടെ ഇവർ വൈൻ ടേസ്റ്റിങ് പരിപാടിയിൽ പങ്കെടുക്കുന്ന വൈറൽ ദൃശ്യവും പുറത്തുവന്നു

വിവാഹത്തെ കുറിച്ചും നാഗാർജുന ഒരു പ്രസ്താവന പുറപ്പെടുവിക്കും എന്ന് പ്രതീക്ഷിക്കുന്നു. വെള്ളിയാഴ്ച രാവിലെയോടെ വിവാഹനിശ്ചയ ചിത്രങ്ങൾ പുറത്തുവന്നേക്കും. അടുത്തിടെ ആരുടേയും പേര് പറയാതെ തന്നെ ശോഭിത താൻ പ്രണയത്തിലാണ് എന്ന് വെളിപ്പെടുത്തിയിരുന്നു