വരനും വധുവും ദേ ഭിത്തിയിൽ ഇങ്ങനിരിക്കും; തെരഞ്ഞെടുപ്പ് കാലത്തെ സേവ് ദി ഡേറ്റ് ചിത്രങ്ങൾ

വിവാഹ ഫോട്ടോ ഷൂട്ട് എങ്ങനെ വ്യത്യസ്തമാക്കാം എന്നാണ് ഓരോ മലയാളികളുടെയും ചിന്ത. അടുത്തിടെ പ്രത്യക്ഷപ്പെട്ട ചില സേവ് ദി ഡേറ്റ് ചിത്രങ്ങൾ സമൂഹമാധ്യമങ്ങളിൽ ചർച്ചയായത് ഗ്ലാമറസ് അവതരണം കൊണ്ടാണ്. എന്നാൽ ചർച്ചയാകാനും ശ്രദ്ധിക്കപ്പെടാനും ഗ്ലാമറസ് ഫോട്ടോകളൊന്നും വേണ്ടെന്ന് തെളിയിക്കുകയാണ് കോട്ടയത്ത് നിന്നുള്ള ഈ ചിത്രങ്ങൾ.

സേവ് ദി ഡേറ്റ് ഫോട്ടോകൾ വൈറലാകുന്നത് അതിലെ ഗ്ലാമറസ് കൊണ്ടോ, അതിന്റെ ദൃശ്യഭംഗി കൊണ്ടോ ആകണമെന്നില്ല. സാമൂഹിക പശ്ചാത്തലമാണ് പ്രധാനം. തദ്ദേശ തെര‍ഞ്ഞെടുപ്പിന്റെ ചൂടിലാണ് കേരളം. അപ്പോൾ പിന്നെ പ്രതിശ്രുത വരനും വധുവിനും അതിൽ നിന്ന് മാറി നിൽക്കാനാകുമോ?

കോട്ടയത്തു നിന്നുള്ള സേവ് ദി ഡേറ്റ് ഫോട്ടോകൾ വൈറലാകുന്നത് അവതരണത്തിലെ വ്യത്യസ്തത കൊണ്ടാണ്. ഫോട്ടോ ഷൂട്ടിലെ താരം വരനും വധുവും ആണെങ്കിലും തെരഞ്ഞെടുപ്പ് കാലത്തെ പ്രചാരണ രംഗങ്ങൾ കോർത്തിണക്കിയ സേവ് ദി ഡേറ്റ ചിത്രങ്ങളാണിത്.

കാലാനുഗതമായ മാറ്റത്തിനൊപ്പം വിവാഹ രീതികളും ആഘോഷങ്ങളും മാറുമ്പോൾ ഫോട്ടോ ഷൂട്ടുകളും വ്യത്യസ്തത പരീക്ഷിക്കുകയാണ്. ഇത്തരമൊരു പുതുമയാണ് മുണ്ടക്കയം ആത്രേയ വെഡിംഗ് സ്റ്റോറീസിന്റെ ഈ ഫോട്ടോ ഷൂട്ട്.

തെരഞ്ഞെടുപ്പ് കാലത്തെ പോസ്റ്റർ പതിക്കലും വോട്ടുപിടുത്തവും ജനകീയ പ്രവർത്തനങ്ങളുമെല്ലാം ഇ സേവ് ദ ഡേറ്റ് ഫോട്ടോ ഷൂട്ടിൽ കാണാം.

കുടിവെള്ള വിഷയവും റോഡ് നവീകരണ പ്രവൃത്തികളുമൊക്കെ സേവ് ദി ഡേറ്റ് ഫോട്ടോഷൂട്ടിൽ വിഷയമാകുന്നു. അതും തീർത്തും റിയലിസ്റ്റിക്കായി തന്നെ.

കുട്ടിക്കാനം ഏലപ്പാറയാണ് ലൊക്കേഷൻ. ഫോട്ടോകൾ സോഷ്യൽ മീഡിയയിൽ വൈറലായതിന്റെ സന്തോഷത്തിലാണ് ഇടുക്കി പള്ളിക്കുന്ന് സ്വദേശി സോബിൻ രാജനും ആൻസി അരുണും. ഈ മാസം 26നാണ് ഇരുവരുടേയും വിവാഹം.