ആരാധനാലയങ്ങൾക്ക് നിയന്ത്രണം തുടരുന്നതിൽ അതൃപ്തി; പള്ളി 'ബാറാക്കി'പ്രതിഷേധം

രാജ്യത്ത് ആരാധനാലയങ്ങൾക്ക് ഏർപ്പെടുത്തിയിരിക്കുന്ന നിയന്ത്രണങ്ങൾ തുടരുന്ന സാഹചര്യത്തിൽ വേറിട്ട പ്രതിഷേധവുമായി വിശ്വാസികൾ

അർജന്‍റീനയിലെ ഇവാഞ്ചലിക്കൽ വിശ്വാസികളാണ് പള്ളി ബാറായി പുനഃക്രമീകരിച്ച് വീണ്ടും തുറന്നത്. കോവിഡ് പശ്ചാത്തലത്തിലുള്ള ലോക്ക് ഡൗൺ ഇളവുകൾക്ക് അയവ് വരുത്തി തുടങ്ങിയെങ്കിലും ആരാധനലായങ്ങളിൽ നിയന്ത്രണം തുടർന്ന സാഹചര്യത്തിലാണ് വ്യത്യസ്ത പ്രതിഷേധം.

പള്ളിക്കുള്ളിൽ ബാറുകളിലെ ടേബിളുകൾ ക്രമീകരിച്ചു. പാസ്റ്റർമാര്‍ വെയ്റ്റർമാരുടെ വേഷത്തിലും എത്തി. ഇത്രയും ചെയ്ത് ട്രേയിൽ മദ്യവുമായെത്തുമെന്ന് കരുതിയെങ്കിൽ തെറ്റി. വെയിറ്റര്‍മാരായ പാസ്റ്റര്‍മാർ കയ്യിലെ ട്രേയിൽ കരുതിയിരുന്നത്  വിശുദ്ധ ബൈബിളായിരുന്നു.

'ഞങ്ങൾ ഇപ്പോൾ ഈ വേഷവും ധരിച്ച് ട്രേയും കയ്യിലേന്തി നിൽക്കുകയാണ്. കാരണം ദൈവവചനം ആളുകളിലെത്തിക്കാൻ ഇപ്പോൾ ഈ വഴിയേ ഉള്ളെന്നാണ് തോന്നുന്നത്' എന്നായിരുന്നു പ്രതിഷേധങ്ങൾക്ക് ചുക്കാൻ പിടിച്ച  പാസ്റ്റർ ഡാനിയൽ കറ്റാനിയോ പറയുന്നത്.

അർജന്‍റീനയിലെ സാൻ ലൊറേൻസോയിലെ ഇവാഞ്ചലിക്കൽ പള്ളിയാണാണ് 'ആരാധന ബാർ' ആയി പുനഃക്രമീകരിച്ചത്. സജ്ജീകരിച്ച ടേബിളുകളിൽ ഭക്ഷണം  എത്തുന്നതിനൊപ്പം ഈ ദൈവിക ആലയത്തില്‍ നിന്ന് ദൈവവചനങ്ങളും ദേശം മുഴുവൻ എത്തുമെന്നാണ് പാസ്റ്റർ പറയുന്നത്.

ബാറുകള്‍ തുറക്കാം, കടകൾ തുറക്കാം പിന്നെ ആരാധനാലയങ്ങളോട് മാത്രം എന്താണ് വിവേചനം. വിശ്വാസം പിന്തുടരാനുള്ള ഞങ്ങളുടെ ഭരണഘടനപരമായ അവകാശമാണ് ഞങ്ങൾക്ക് വേണ്ടത്.. കറ്റാനിയോ പറയുന്നു.