ബെംഗളുരു മയക്ക് മരുന്ന് കേസിൽ താരദമ്പതികൾക്ക് നോട്ടീസ്: കന്നഡ സിനിമയ്ക്ക് വീണ്ടും ഷോക്ക് നൽകി ക്രൈംബ്രാഞ്ച്

ബെംഗളൂരു മയക്ക് മരുന്ന കേസിൽ ചോദ്യം ചെയ്യലിന് ഹാജരാകാൻ താരദമ്പതികൾക്ക് നോട്ടീസ് നൽകി സെൻട്രൽ ക്രൈംബ്രാഞ്ച്(സി.സി.ബി). നടൻ ദിഗ്നാഥിനും ഭാര്യയും നടിയുമായ ഐന്ദ്രിത റായ്ക്കും സി.സി.ബി. നോട്ടീസ് നൽകയത്.

ഇരുവരും ബുധനാഴ്ച ചോദ്യം ചെയ്യലിന് ഹാജരാകണമെന്നാണ് സി.സി.ബി നിർദ്ദേശിച്ചിരിക്കുന്നത്. ഇതോടെ ബെംഗളുരു മയക്ക് മരുന്ന് കേസ് അന്വേഷണം കൂടുതൽ താരങ്ങളിലേക്ക് നീങ്ങുന്നെന്ന സൂചനയാണ് സിസിബി നൽകിയിരിക്കുന്നത്.

കേസുമായി ബന്ധപ്പെട്ട് കന്നഡ സിനിമയിലെ പ്രമുഖ താരങ്ങളായ രാഗിണി ദ്വിവേദി, സഞ്ജന ഗൽറാണി എന്നിവരെ അറസ്റ്റ് ചെയ്തിരുന്നു. ഇതിന് പിന്നാലെയാണ് താരദമ്പതിമാർക്കും നോട്ടീസ് നൽകിയിരിക്കുന്നത്.

പതിനഞ്ച് വർഷത്തോളമായി കന്നഡ സിനിമയിൽ സജീവമാണ് ദിഗ്നാഥ്. ഭാര്യ ഐന്ദ്രിത റായ് 30-ലേറെ സിനിമകളിൽ അഭിനയിച്ചിട്ടുണ്ട്. 2018-ലാണ് ഇരുവരും വിവാഹിതരായത്. ചൊവ്വാഴ്ച കർണാടകയിലെ മുൻ മന്ത്രി ജീവരാജ് ആൽവയുടെ മകൻ ആദിത്യ ആൽവയുടെ വസതിയിലും സി.സി.ബി. റെയ്‌ഡ് നടത്തി കേസിൽ പ്രതി ചേർക്കപ്പെട്ടതിന് പിന്നാലെ ആദിത്യ ആൽവ ഒളിവിൽപോയി. ഇയാളെ കണ്ടെത്താൻ അന്വേഷണം തുടരുകയാണെന്നാണ് സി.സി.ബി വ്യക്തമാക്കി.

ആദിത്യയുടെ വീട്ടിൽ മയക്കുമരുന്ന് പാർട്ടികൾ നടത്തിയിരുന്നതായി അന്വേഷണ സംഘത്തിന് വിവരം ലഭിച്ചിട്ടുണ്ട്. ബോളിവുഡ് നടൻ വിവേക് ഒബ്റോയിയുടെ ബന്ധുവാണ് ആദിത്യ ആൽവ.

സീരിയൽ നടി അനിഘ, മലയാളികളായ അനൂപ് മുഹമ്മദ്, റിജേഷ് രവീന്ദ്രൻ എന്നിവരെ നാർകോട്ടിക്സ് കൺട്രോൾ ബ്യൂറോ(എൻ.സി.ബി) പിടികൂടിയതിന് പിന്നാലെയാണ് കന്നഡ സിനിമ മേഖലയിലേക്കും അന്വേഷണം നീണ്ടത്.

സീരിയൽ നടി അനിഘ പല സിനിമാ താരങ്ങൾക്കും മയക്കുമരുന്ന് എത്തിച്ചുനൽകിയിരുന്നതായി വെളിപ്പെടുത്തിയിരുന്നു. 15 പേർക്കെതിരേയാണ് സി.സി.ബി ഇതുവരെ കേസ് രജിസ്റ്റർ ചെയ്തിരിക്കുന്നത്.