തർക്കത്തിനൊടുവിൽ യുവാവിനെ അരകല്ലു കൊണ്ട് കൊലപ്പെടുത്തി; കാമുകിയെ തിരഞ്ഞ് പൊലീസ്

ലക്നൗ: യുവാവിനെ അരകല്ലു കൊണ്ട് അടിച്ചു കൊലപ്പെടുത്തിയ ശേഷം കടന്നുകളഞ്ഞ കാമുകിയെ തിരഞ്ഞ് പൊലീസ്. യുപി ഹമിർപുർ സ്വദേശിയായ വീരേന്ദ്ര എന്ന ഇരുപത്തിമൂന്നുകാരനാണ് കൊല്ലപ്പെട്ടത്. സംഭവത്തിൽ ഇയാൾക്കൊപ്പം കഴിഞ്ഞിരുന്ന കാമുകി വർഷയ്ക്കായി പൊലീസ് തിരച്ചിൽ ഊർജിതമാക്കി

ഇക്കഴി‍ഞ്ഞ ചൊവ്വാഴ്ച വൈകിട്ടോടെയാണ് സംഭവം. പൊലീസ് പറയുന്നതനുസരിച്ച് വീരേന്ദ്രയും-വർഷയും ലിവ് ഇൻ റിലേഷൻഷിപ്പിലായിരുന്നു. വീരേന്ദ്രയുടെ വീട്ടിൽ തന്നെയാണ് ഇരുവരും കഴിഞ്ഞിരുന്നത്.

ഇക്കഴിഞ്ഞ ചൊവ്വാഴ്ച വൈകിട്ടോടെ ഇരുവരും തമ്മിൽ എന്തോ കാര്യത്തിന് വലിയ വഴക്കുണ്ടായതായി അയൽക്കാരിയുടെ മൊഴിയനുസരിച്ച് പൊലീസ് പറയുന്നു. വീരേന്ദ്രന്‍റെ അമ്മ ഈ സമയം ജോലി ആവശ്യങ്ങള്‍ക്കായി പുറത്തു പോയിരുന്നു. സഹോദരനും സ്ഥലത്തുണ്ടായിരുന്നില്ല.

അൽപസമയം കഴിഞ്ഞ് വീടിന് പുറത്തിറങ്ങിയ വർഷ, താൻ പൊലീസിൽ പരാതി നൽകുവാൻ പോവുകയാണെന്നറിയിച്ച് വീട് പുറത്തു നിന്ന് പൂട്ടിപ്പോയെന്നാണ് അയൽക്കാർ പറയുന്നത്.

രാത്രി എട്ട് മണിയോടെ വീരേന്ദ്രയുടെ അമ്മയെത്തി വീട് തുറന്നപ്പോഴാണ് രക്തത്തിൽ കുളിച്ചു കിടക്കുന്ന മകനെ കണ്ടത്. ഇവർ ഉടൻ തന്നെ പൊലീസിനെ അറിയിക്കുകയായിരുന്നു.

അരക്കല്ലുപയോഗിച്ച് അടിച്ചാണ് യുവാവിനെ കൊലപ്പെടുത്തിയതെന്നാണ് റാത്ത് പൊലീസ് എസ്എച്ച്ഒ കെ.കെ.പാണ്ഡെ അറിയിച്ചത്. സംഭവശേഷം കടന്നുകളഞ്ഞ യുവതിക്കായി തിരച്ചിൽ ആരംഭിച്ചെന്നും അദ്ദേഹം വ്യക്തമാക്കി.