National Awards 2023| ഒരു അവർഡ് പോലും ലഭിക്കാതെ സൂര്യയുടെ ജയ്ഭീം; നിരാശ പങ്കുവെച്ച് നടൻ നാനി

ദേശീയ ചലച്ചിത്ര പുരസ്കാരത്തിൽ സൂര്യ നായകനായ തമിഴ് ചിത്രം ജയ്ഭീമിന് യാതൊരു പരിഗണനയും ലഭിക്കാത്തതിൽ തമിഴ്നാട്ടിൽ വലിയ പ്രതിഷേധം ഉയരുന്നുണ്ട്. തെന്നിന്ത്യയിൽ നിന്ന് മികച്ച നിരവധി ചിത്രങ്ങൾ പുറത്തിറങ്ങിയ വർഷമായിരുന്നു 2021.

അതിൽ തന്നെ ഏറ്റവും മികച്ച സിനിമകൾ പുറത്തിറങ്ങിയത് തമിഴിലാണ്. കർണൻ, സാർപട്ട പരമ്പരൈ, ജയ്ഭീം, കടൈസി വിവസായി തുടങ്ങി മനോഹരമായ ചിത്രങ്ങളാണ് തമിഴ് സിനിമ നൽകിയത്. ഇതിൽ കടൈസി വിവസായി മികച്ച തമിഴ് ചിത്രമായി തിരഞ്ഞെടുക്കപ്പെട്ടു.

നിരൂപക പ്രശംസ നേടിയ കർണൻ, സാർപട്ട പരമ്പരൈ, ജയ്ഭീം തുടങ്ങിയ ചിത്രങ്ങളെല്ലാം പൂർണമായി അവഗണിക്കപ്പെട്ടതിൽ കടുത്ത വിമർശനവും ഉയരുന്നുണ്ട്. സൂര്യ പ്രധാന വേഷം അവതരിപ്പിച്ച ജയ് ഭീം ആയിരുന്നു അവാർഡ് പ്രതീക്ഷയിൽ മുന്നിലുണ്ടായിരുന്നത്.

പുരസ്കാരം ലഭിക്കാത്തതിൽ ആരാധകർ മാത്രമല്ല, സിനിമാ ലോകത്തിലെ പ്രമുഖർ പോലും നിരാശ പ്രകടിപ്പിച്ചിരിക്കുകയാണ്. തെലുങ്ക് നടൻ നാനി തന്റെ നിരാശ പരസ്യമായി പ്രകടിപ്പിക്കുകയും ചെയ്തു.

ഇൻസ്റ്റഗ്രാം സ്റ്റോറിയിൽ #JaiBhim നൊപ്പം ഹാർട്ട് ബ്രോക്കൺ ഇമോജി കൂടി പങ്കുവെച്ചാണ് നാനി തന്റെ നിരാശ പ്രകടിപ്പിച്ചത്. മികച്ച സിനിമ, മികച്ച നടൻ തുടങ്ങിയ വിഭാഗങ്ങളിൽ ജയ് ഭീം ഉണ്ടായിരുന്നു.

കഴിഞ്ഞ വർഷം, സൂര്യ നായകനായ സൂരൈര് പോട്ര് പ്രധാന അവാർഡുകളെല്ലാം നേടിയിരുന്നു. മികച്ച നടൻ, മികച്ച നടി, മികച്ച സിനിമ, മികച്ച സംവിധായകൻ, മികച്ച സംഗീത സംവിധായകൻ തുടങ്ങിയവയ്ക്കുള്ള ദേശീയ പുരസ്കാരമെല്ലാം സ്വന്തമാക്കിയത് സൂരൈര് പോട്രിനായിരുന്നു.