Anirudh| 8 കോടി പ്രതിഫലം വാങ്ങുന്ന എആർ റഹ്മാൻ പോലും പിന്നിൽ; സംഗീത ലോകത്തെ സൂപ്പർ സ്റ്റാറായി അനിരുദ്ധ്

എത്ര വലിയ സൂപ്പർസ്റ്റാർ സിനിമയാണെങ്കിലും അതിൽ ഒഴിച്ചു കൂടാനാകാത്ത ഒന്നാണ് അനിരുദ്ധ് രവിചന്ദറിന്റെ സംഗീതം. പ്രിയ താരങ്ങളുടെ മാസ് എൻട്രിക്ക് മാസ് ബിജിഎമ്മും ആരാധകരെ ആനന്ദത്തിന്റെ പരമോന്നതിയിലെത്തിക്കുന്ന ഗാനങ്ങളുമെല്ലാം സിനിമയുടെ വിജയത്തിന് ഇന്ന് അനിവാര്യമായി മാറിയിരിക്കുകയാണ്.

സിനിമയുടെ വിജയത്തിന് വാണിജ്യ സിനിമയ്ക്ക് ഒഴിച്ചു കൂടാനാകാത്ത ഒന്നാണ് ഇന്ന് അനിരുദ്ധ് ടച്ച്. രജനീകാന്ത് ചിത്രം ജയിലറിലും ഷാരൂഖ് ചിത്രം ജവാനിലുമെല്ലാം സിനിമാ ലോകം അനിരുദ്ധ് ഇംപാക്ട് കണ്ടതാണ്.

ഷാരൂഖിനെ നായകനാക്കി തെന്നിന്ത്യൻ സംവിധായകൻ ആറ്റ്ലീ ആദ്യമായി ഒരുക്കിയ ബോളിവുഡ് ചിത്രത്തിലൂടെ നയൻതാരയ്ക്കൊപ്പം അനിരുദ്ധും ബോളിവുഡിലേക്ക് ചുവടുറപ്പിച്ചു കഴിഞ്ഞു. ഏറ്റവും പുതിയ റിപ്പോർട്ടുകൾ അനുസരിച്ച് തമിഴ് സിനിമയിൽ ഏറ്റവും കൂടുതൽ പ്രതിഫലം വാങ്ങുന്ന സംഗീത സംവിധായകനാണ് അനിരുദ്ധ്.

സാക്ഷാൽ എആർ റഹ്മാനെയാണ് അനിരുദ്ധ് പിന്നിലാക്കിയത്. ഒരു സിനിമയ്ക്ക് എട്ട് കോടി രൂപയാണ് എആർ റഹ്മാൻ വാങ്ങുന്ന പ്രതിഫലം. ഇപ്പോൾ, പ്രതിഫല തുകയിൽ എആർ റഹ്മാനെ പിന്നിലാക്കിയിരിക്കുകയാണ് അനിരുദ്ധ്.

മാത്രമല്ല, തമിഴ് സിനിമയിൽ ഏറ്റവും കൂടുതൽ ഡിമാന്റുള്ള സംഗീത സംവിധായകനും അനിരുദ്ധ് തന്നെയാണ്. പത്ത് കോടിയാണ് ഒരു സിനിമയ്ക്ക് അനിരുദ്ധ് വാങ്ങുന്ന പ്രതിഫലം എന്നാണ് റിപ്പോർട്ടുകൾ.

ഏറ്റവും പുതിയ ചിത്രങ്ങളായ ജെയിലറിലും ജവാനിലും പത്ത് കോടിയാണ് അനിരുദ്ധ് പ്രതിഫലമായി സ്വീകരിച്ചത്. കൂടാതെ, വരാനിരിക്കുന്ന വമ്പൻ ചിത്രങ്ങൾക്കെല്ലാം സംഗീതം നൽകുന്നതും അനിരുദ്ധാണ്.

വിജയ് നായകനാകുന്ന ലിയോ, ജൂനിയർ എൻടിആറിന്റെ ദേവര, കമൽ ഹാസൻ ചിത്രം ഇന്ത്യൻ 2, അജിത് നായകനാകുന്ന വിടാ മുയർച്ചി എന്നീ ചിത്രങ്ങൾക്കെല്ലാം സംഗീത സംവിധാനം അനിരുദ്ധാണ്.

2012 ൽ ധനുഷിനൊപ്പം കൊലവെറി സോങ്ങുമായാണ് അനിരുദ്ധിന്റെ രംഗപ്രവേശം. പാട്ടും പാട്ടിനൊപ്പം അനിരുദ്ധും സൂപ്പർ ഹിറ്റായി. നേരത്തേ ഒരു ചിത്രത്തിന് 8 കോടിയായിരുന്നു അനിരുദ്ധിന്റെ പ്രതിഫലം.