ബോക്‌സ് ഓഫീസ് ഹിറ്റായി 'ഓപ്പൺഹൈമർ'; രണ്ട് ദിവസം കൊണ്ട് ക്രിസ്റ്റഫർ നോളൻ ചിത്രം നേടിയത് 31.5 കോടി

ഹോളിവുഡ് സിനിമാ പ്രേമികൾക്കിടയിൽ ഏറ്റവുമധികം ആരാധകരുള്ള സംവിധായകനാണ് ക്രിസ്റ്റഫർ നോളൻ. അദ്ദേഹത്തിന്റെ പുതിയ ചിത്രം ‘ഓപ്പൺഹൈമർ’ ജൂലൈ 21-നാണ് റിലീസ് ചെയ്തത്. 

ഇന്ത്യയിൽ ചിത്രം രണ്ട് ദിവസം 31.50 കോടി രൂപകളക്ഷൻ നേടി. ആദ്യദിനം 13.50 കോടിയാണ് ഇന്ത്യൻ ബോക്സോഫീസിൽ ഓപ്പൺഹൈമർ നേടിയതെന്നാണ് റിപ്പോർട്ടുകൾ.

അന്താരാഷ്ട്ര തലത്തിൽ ഗ്രെറ്റ ഗെർവിഗിന്റെ ബാർബിക്കെതിരെ ഓപ്പൺഹൈമർ കടുത്ത മത്സരമാണ് നേരിടുന്നത്. എന്നാൽ ഇതുവരെ ഇന്ത്യൻ വിപണി നോളന്റെ ചിത്രത്തിന് അനുകൂലമാണ്. കാരണം ബാർബിയുടെ ആദ്യ രണ്ട് ദിവസത്തെ കളക്ഷൻ ഇവിടെ 11.50 കോടി രൂപ മാത്രമാണ്.

ആറ്റംബോംബിന്റെ പിതാവെന്നറിയപ്പെടുന്ന ഭൗതികശാസ്ത്രജ്ഞൻ ജെ. റോബർട്ട് ഓപ്പൺഹൈമറിന്റെ ജീവിതം ആസ്പദമാക്കിയാണ് നോളൻ ചിത്രം ഒരുക്കിയത്. ഭൗതികശാസ്ത്രജ്ഞനായിരുരുന്ന ഓപ്പൺഹൈമറിന്റെ ജീവിതവും ആദ്യ ആറ്റംബോംബ് വികസിപ്പിച്ച കഥകളുമെല്ലാം ചിത്രത്തിൽ വിവരിക്കുന്നുണ്ട്.

എമിലി ബ്ലണ്ട്, മാറ്റ് ഡാമൺ, റോബർട്ട് ഡൗണി ജൂനിയർ, ഫ്ലോറൻസ് പഗ്, റാമി മാലെക്, ബെന്നി സാഫ്ഡി, ജോഷ് ഹാർട്ട്‌നെറ്റ്, ഡെയ്ൻ ഡീഹാൻ, ജാക്ക് ക്വയ്ഡ്, മാത്യു ബാഗ് എന്നിവരോടൊപ്പം ടൈറ്റിൽ റോളിൽ ഓപ്പൺഹൈമറിനെ സിലിയൻ മർഫി അവതരിപ്പിക്കുന്നു.

പൂര്‍ണ്ണമായും 70 എംഎം ഐമാക്‌സ് ക്യാമറ ഉപയോഗിച്ച് ചിത്രീകരിച്ച ആദ്യ സിനിമ സിനിമയാണ് ക്രിസ്റ്റഫര്‍ നോളന്റെ ഓപ്പണ്‍ഹൈമര്‍. 1945-ല്‍ ന്യൂ മെക്സിക്കോയിലെ മരുഭൂമിയില്‍ നടന്ന ന്യൂക്ലിയര്‍ ബോംബിന്റെ ആദ്യത്തെ പരീക്ഷണ സ്ഫോടനമായ ട്രിനിറ്റി ടെസ്റ്റ് ഓപ്പണ്‍ഹൈമര്‍ ടീം പൂര്‍ണ്ണമായും സി ജി ഐ ഇല്ലാതെയാണ് പുനഃസൃഷ്ടിച്ചത്.