നയൻതാരയുടെ വിവാഹ നിശ്ചയം കഴിഞ്ഞോ? പുതിയ ചിത്രം പങ്കുവെച്ച് വിഘ്നേഷ് ശിവൻ

തെന്നിന്ത്യയിലെ ലേഡി സൂപ്പർസ്റ്റാർ നയൻതാരയുടെ വിവാഹ നിശ്ചയം കഴിഞ്ഞോ? സംവിധായകൻ വിഘ്നേഷ് ശിവൻ പങ്കുവെച്ച പുതിയ ചിത്രം കണ്ട് ആരാധകർ അന്വേഷിച്ചു കൊണ്ടിരിക്കുന്നത് ഇതാണ്. നയൻതാരയും വിഘ്നേഷും തമ്മിൽ പ്രണയത്തിലാണെന്ന കാര്യം അറിയാമെങ്കിലും വിവാഹ നിശ്ചയം കഴിഞ്ഞോ എന്നാണ് ആരാധകർ ചോദിക്കുന്നത്.

വിഘ്നേഷന്റെ നെഞ്ചോട് ചേർത്ത് കൈവെച്ച് നിൽക്കുന്ന നയൻതാരയുടെ ചിത്രമാണ് ഇൻസ്റ്റഗ്രാമാൽ പങ്കുവെച്ചിരിക്കുന്നത്. ചിത്രത്തിൽ ഇരുവരുടേയും മുഖമില്ല. പക്ഷേ നയൻസിന്റെ വലതു കൈയ്യിലെ മോതിര വിരലിൽ ഒരു മോതിരം വ്യക്തമാണ്. ഈ ഫോട്ടോയ്ക്ക് വിഘ്നേഷ് നൽകിയ ക്യാപ്ഷനാണ് ആരാധകർക്ക് സന്തോഷം നൽകുന്നത്.

സോഷ്യൽമീഡിയയിൽ ഇതിനകം വൈറലാണ് ചിത്രം. 'വിരലിൽ ജീവൻ കൊരുത്തു' എന്നർത്ഥം വരുന്ന 'വിരലോട് ഉയർ കൂട കോർത്ത്' എന്നാണ് വിഘ്നേഷിന്റെ കുറിപ്പ്. ഇത് കണ്ടതോടെയാണ് ഇരുവരുടേയും വിവാഹ നിശ്ചയം കഴിഞ്ഞതായി ആരാധകർ അനുമാനിക്കുന്നത്. നിരവധി പേർ അഭിനന്ദിച്ച് കമന്റ് നൽകിയിട്ടുമുണ്ട്.

സോഷ്യൽമീഡിയയിൽ നയൻതാരയ്ക്ക് അക്കൗണ്ടില്ല. വിഘ്നേഷ് ശിവനാണ് നയന്‍താരയ്ക്കൊപ്പമുള്ള ചിത്രങ്ങൾ ഇൻസ്റ്റഗ്രാമിൽ പങ്കുവെക്കുന്നത്. എന്തായാലും നിശ്ചയം കഴിഞ്ഞോ എന്ന ചോദ്യത്തിന് വിഘ്നേഷ് ഇതുവരെ ഔദ്യോഗികമായി മറുപടിയൊന്നും പറഞ്ഞിട്ടില്ല.

നയൻതാരയും വിഘ്നേഷും 2015 മുതൽ പ്രണയത്തിലാണ്. വിഘ്നേഷ് സംവിധാനം ചെയ്ത നാനും റൗഡി താൻ എന്ന സിനിമയുടെ ചിത്രീകരണത്തിനിടയിലാണ് ഇരുവരും പ്രണയത്തിലാകുന്നത്. ചിത്രത്തിൽ നയൻസായിരുന്നു നായിക. നയൻതാരയ്ക്ക് ശക്തമായ രണ്ടാം വരവ് ഒരുക്കിയ ചിത്രമായിരുന്നു വിജയ് സേതുപതി നായകനായ നാനും റൗഡി താൻ.

ഇതിനകം നിരവധി തവണ വിഘ്നേഷുമായി നയൻസിന്റെ വിവാഹം കഴിഞ്ഞെന്ന തരത്തിൽ വാർത്തകൾ പ്രചരിച്ചെങ്കിലും രണ്ടുപേരും അതിനോടൊന്നും പ്രതകരിച്ചിട്ടില്ല. വിവാഹത്തെ കുറിച്ചോ സ്വകാര്യ ജീവിതത്തെ കുറിച്ചോ നയൻതാര പൊതുഇടങ്ങളിൽ പ്രതികരിക്കാറോ സംസാരിക്കാറോ ഇല്ല.

കാതുവാക്കുള രെണ്ടു കാതൽ എന്ന ചിത്രമാണ് വിഘ്നേഷ് ശിവൻ ഇപ്പോൾ സംവിധാനം ചെയ്യുന്നത്. നയൻതാരയ്ക്ക് പുറമേ, സാമന്ത അക്കിനേനിയും ചിത്രത്തിൽ നായികയാണ്. വിജയ് സേതുപതിയാണ് ചിത്രത്തിൽ നായകനായി എത്തുന്നത്. നയൻതാരയും പുതിയ ചിത്രങ്ങളുടെ തിരക്കിലാണ്. തെന്നിന്ത്യയിൽ ഏറ്റവും കൂടുതൽ പ്രതിഫലം വാങ്ങിക്കുന്ന നടിയാണ് നയൻതാര.

മൂക്കിത്തി അമ്മൻ നയൻതാരയുടെ ഏറ്റവും ഒടുവിൽ പുറത്തിറങ്ങിയ ചിത്രം. ലോക്ക്ഡൗൺ കാലത്ത് ആമസോൺ പ്രൈമിലൂടെയായിരുന്നു ചിത്രത്തിന്റെ റിലീസ്. മലയാളത്തിൽ നിഴൽ ആണ് താരത്തിന്റെ ഇനി പുറത്തിറങ്ങാനുള്ള ചിത്രം. കുഞ്ചാക്കോ ബോബനാണ് നിഴലിൽ നായകൻ. നയൻതാരയും ചാക്കോച്ചനും ഒന്നിച്ചഭിനയിക്കുന്ന ആദ്യ ചിത്രമാണിത്. ലൗ ആക്ഷൻ ഡ്രാമയിലാണ് നയൻതാര അവസാനമായി മലയാളത്തിൽ അഭിനയിച്ചത്.

ഇതുകൂടാതെ, നേട്രികൻ, അണ്ണാതെ, എന്നീ ചിത്രങ്ങളിലും നയൻതാരയാണ് നായിക. രജനീകാന്ത് നായകനാകുന്ന അണ്ണാതെയുടെ ചിത്രീകരണം ഹൈദരാബാദിലാണ്. സിനിമയുടെ ഷൂട്ടിങ്ങ് സംഘത്തിൽ കോവിഡ് ബാധിച്ചതിനെ തുടർന്ന് രജനി അടക്കമുള്ളവർ നിരീക്ഷണത്തിൽ പോയിരുന്നു.  ഇതുകൂടാതെ ഫഹദ് ഫാസിൽ നായകനാകുന്ന അൽഫോൻസ് പുത്രൻ ചിത്രത്തിലും നായികയാകുന്നത് നയൻതാരയാണ്.