വാമിഖ ഗബ്ബി ബാഹുബലിയിൽ ഉണ്ടായിരുന്നോ? ആരാധകരെ കൺഫ്യൂഷനാക്കി താരത്തിന്റെ പരാമർശം

വാമിഖ ഗബ്ബി ബാഹുബലിയിലുണ്ടോ? നടിയുടെ ഒരു പരാമർശത്തിന്റെ പേരിൽ ആരാധകർക്കിടയിലുണ്ടായ കൺഫ്യൂഷനാണിത്. ഒരു അഭിമുഖത്തിൽ ബാഹുബലിയിൽ താനും ഭാഗമായിരുന്നുവെന്ന വാമിഖയുടെ പരാമർശമാണ് ആശയക്കുഴപ്പത്തിന് ഇടയാക്കിയത്.

ബാഹുബലിക്കു വേണ്ടി താൻ പരിശീലനം നടത്തിയിരുന്നുവെന്നും എന്നാൽ ചിത്രത്തിന്റെ സംവിധായകർ മാറിക്കൊണ്ടിരുന്നതിനാൽ ചിത്രം നീണ്ടു പോയി എന്ന തരത്തിലായിരുന്നു വാമിഖയുടെ പരാമർശം.

സംവിധായകന്റെ കാര്യത്തിൽ അന്തിമ തീരുമാനമായോ എന്ന് താൻ അന്വേഷിച്ചിരുന്നു. എന്തുകൊണ്ടാണ് ആ പ്രൊജക്ട് വേണ്ടെന്നുവെച്ചതെന്ന് അറിയില്ല. ചിത്രം പുനരാരംഭിക്കുമെന്നാണ് പ്രതീക്ഷയെന്നുമാണ് പ്രചരിക്കുന്ന വീഡിയോയിൽ വാമിഖ പറയുന്നത്.

ഒരു അഭിമുഖത്തിന്റെ ഈ ഒരു ഭാഗം മാത്രമാണ് സോഷ്യൽമീഡിയയിൽ പ്രചരിച്ചത്. വാമിഖ പറഞ്ഞത് കേട്ട് തെറ്റായ കാര്യങ്ങൾ പ്രചരിപ്പിക്കുന്നുവെന്ന് കമന്റ് ബോക്സിൽ പലരും രോഷപ്രകടനം നടത്തി.

എന്നാൽ യഥാർത്ഥത്തിൽ വാമിഖ പറഞ്ഞത് വാസ്തവമാണ്. പക്ഷേ, പറഞ്ഞത് 2015 ൽ രാജമൗലി സംവിധാനം ചെയ്ത് പുറത്തിറങ്ങിയ ഇന്ത്യൻ സിനിമാ ചരിത്രത്തിലെ ഇതിഹാസമായ ബാഹുബലിയെ കുറിച്ചല്ലെന്ന് മാത്രം.

വീണ്ടും കൺഫ്യൂഷനായോ? രാജമൗലിയുടെ ബാഹുബലിക്ക് ഒരു പ്രീക്വൽ നെറ്റ്ഫ്ലിക്സ് പ്രഖ്യാപിച്ചിരുന്നു. 'ബാഹുബലി: ബിഫോർ ദി ബിഗ്നിങ്' എന്നായിരുന്നു പ്രൊജക്ട്. ബാഹുബലി സിനിമയിലെ ശിവകാമിയുടെ കഥാപാത്രത്തെ കേന്ദ്രീകരിച്ചായിരുന്നു കഥ.

ഇതിനായി മൃണാൽ ഠാക്കൂറിനെയായിരുന്നു ആദ്യം തീരുമാനിച്ചിരുന്നത്. പിന്നീട് കഥാപാത്രം വാമിഖയിലേക്ക് എത്തുകയായിരുന്നു. 2018 ൽ പ്രഖ്യാപിച്ച ചിത്രം പിന്നീട് നെറ്റ്ഫ്ലിക്സ് ഉപേക്ഷിച്ചുവെന്നാണ് റിപ്പോർട്ട്. സംവിധായകന്റെ കാര്യത്തിലുള്ള ആശയക്കുഴപ്പമാണ് ചിത്രം ഉപേക്ഷിക്കാനുള്ള കാരണമെന്നാണ് റിപ്പോർട്ടുകൾ.