Trisha| 'സ്കൂൾ ഫ്രണ്ടിനെ വർഷങ്ങൾക്കു ശേഷം വീണ്ടും കാണുന്നതു പോലെ'; വിജയിയെ കുറിച്ച് തൃഷ

15 വർഷങ്ങൾക്കു ശേഷമാണ് ബിഗ് സ്ക്രീനിൽ വിജയ്-തൃഷ താര ജോഡി വീണ്ടും എത്തിയത്. തങ്ങളുടെ പ്രിയ താരങ്ങളെ വീണ്ടും ഒന്നിപ്പിച്ചതിന് ലോകേഷ് കനകരാജിനോടാണ് ആരാധകർ നന്ദി പറഞ്ഞത്.

ഇരുവരും ഒന്നിച്ചഭിനയിച്ച ലിയോ തിയേറ്ററുകളിൽ റെക്കോർഡുകൾ ഭേദിച്ച് പ്രദർശനം തുടരുകയാണ്. ലിയോയുടെ വിജയാഘോഷം ചെന്നൈ നെഹ്രു സ്റ്റേഡിയത്തിൽ നടന്നിരുന്നു.

ചുവപ്പ് സാരിയിൽ അതിസുന്ദരിയായാണ് തൃഷ വിജയാഘോഷത്തിന് എത്തിയത്. വർഷങ്ങൾക്കു ശേഷം വിജയിക്കൊപ്പം അഭിനയിക്കാൻ അവസരം ലഭിച്ചതിന്റെ സന്തോഷം തൃഷ പ്രകടിപ്പിച്ചു.

എൽസിയുവിന്റെ ഭാഗമാകാൻ കഴിഞ്ഞതിന്റെ സന്തോഷം പങ്കുവെച്ച തൃഷ ലിയോയിൽ അഭിനയിക്കുമ്പോൾ ജോലി ചെയ്യുന്നതായല്ല, മറിച്ച് വെക്കേഷന് എത്തിയതുപോലെയായിരുന്നു അനുഭവമെന്ന് പറഞ്ഞു.

“വീട് ഒരു സ്ഥലമല്ല, മറിച്ച് അത് ഒരു വ്യക്തിയാണെന്നാണ് പറയാറ്, ലിയോയുടെ സെറ്റും അതുപോലെയായിരുന്നുവെന്ന് തൃഷ പറയുന്നു. വർഷങ്ങൾക്കു ശേഷം സ്കൂൾ സുഹൃത്തിനെ വീണ്ടും കണ്ടത് പോലെയായിരുന്നു വിജയിക്കൊപ്പം ജോലി ചെയ്തതെന്നും തൃഷ.

വർഷങ്ങൾക്ക് മുമ്പുള്ള അതേ അടുപ്പവും പരിചയവുമായിരുന്നു വിജയിക്കൊപ്പമുള്ള അനുഭവം. തന്റെ 20 വർഷം നീണ്ട കരിയറിൽ, ഒരു സഹനടനോടൊപ്പമുള്ള ഏറ്റവും ദൈർഘ്യമേറിയ യാത്ര വിജയ്ക്കൊപ്പമായിരുന്നു.

ഗൗതം മേനോനൊപ്പം അഭിനയിക്കാൻ സാധിച്ചതിന്റെ സന്തോഷവും തൃഷ പങ്കുവെച്ചു. ഇത് താൻ ഒരിക്കലും പ്രതീക്ഷിക്കാത്ത കാര്യമായിരുന്നു. വിണ്ണൈതാണ്ടി വരുവായ എന്ന ഗൗതം മേനോന്റെ ചിത്രത്തിൽ നായികയായിരുന്നു തൃഷ.

നിശബ്ദതയും വിജയവുമാണ് ഏറ്റവും നല്ല പ്രതികാരമെന്ന് ലിയോ ടീമിനെ പ്രതിനിധീകരിച്ച് താൻ പറയാൻ ആഗ്രഹിക്കുന്നുവെന്നും തൃഷ പറഞ്ഞു. ഒക്ടോബർ 19 ന് പുറത്തിറങ്ങിയ ലിയോ തമിഴിലെ ഏറ്റവും കൂടുതൽ കളക്ഷൻ നേടുന്ന ചിത്രമെന്ന റെക്കോർഡാണ് സ്വന്തമാക്കിയത്.