മോഹൻലാലിന് പിന്നാലെ മമ്മൂട്ടിയും കുഞ്ചാക്കോ ബോബനും കൊളംബോയിൽ

മഹേഷ് നാരായണൻ സംവിധാനം ചെയ്യുന്ന സിനിമയുടെ ചിത്രീകരണം ശ്രീലങ്കയിൽ ഇന്നു തുടങ്ങും. മമ്മൂട്ടിയും മോഹൻലാലും പ്രധാന വേഷങ്ങളിലെത്തുന്ന സിനിമ മലയാളത്തിലെ തന്നെ ഏറ്റവും ചെലവേറിയ സിനിമകളിലൊന്നാണ്.

സിനിമയുടെ ചിത്രീകരണത്തിനായി മോഹൻലാലിന് പിന്നാലെ മമ്മൂട്ടിയും കൊളംബോയിൽ വിമാനമിറങ്ങി. കൊച്ചിയിൽ നിന്ന് മമ്മൂട്ടിക്കൊപ്പം ഭാര്യ സുൽഫത്ത്, ജോർജ്, കുഞ്ചാക്കോ ബോബൻ, ആന്റണി പെരുമ്പാവൂർ എന്നിവരും കൊളംബോയിലേക്ക് വിമാനം കയറിയിരുന്നു.

നെടുമ്പാശ്ശേരി രാജ്യാന്തര വിമാനത്താവളത്തിൽ നിന്നുള്ള വീഡിയോ ആന്റണി പെരുമ്പാവൂർ സോഷ്യൽ മീഡിയയില്‍ പങ്കുവച്ചു. 

മോഹൻലാൽ രണ്ട് ദിവസം മുമ്പേ കൊളംബോയിലെത്തിയിരുന്നു. മമ്മൂട്ടിയും മോഹൻലാലും  താമസിക്കുന്നതും ഒരേ ഹോട്ടലിലാണ്.

11 വർഷത്തിനുശേഷമാണ് മമ്മൂട്ടിയും മോഹൻലാലും സിനിമയിൽ ഒരുമിക്കുന്നത്. മമ്മൂട്ടിയും മോഹൻലാലും നായകവേഷത്തിലെത്തിയ ഒടുവിലത്തെ ചിത്രം 2008 ൽ റിലീസ് ചെയ്ത ട്വന്റി 20 ആയിരുന്നു.

പിന്നീട് 2013ൽ പുറത്തിറങ്ങിയ കടൽ കടന്നൊരു മാത്തുക്കുട്ടിയിലും ഇരുവരും ഒരുമിച്ചെത്തി.

ശ്രീലങ്ക, യു കെ, അസർബൈജാൻ, ദുബായ്, ഡൽഹി, ഹൈദരാബാദ്, വിശാഖപട്ടണം എന്നിങ്ങനെ വിശാലമാണ് പുതിയ ചിത്രത്തിന്റെ ഷെഡ്യൂൾ. കരൺ ജോഹർ ചിത്രങ്ങളുടെ ക്യാമറാമാനായ മാനുഷാണ് ഛായാഗ്രാഹകൻ.