ഭ്രമയുഗം വിസ്മയിപ്പിക്കും ! ആസിഫ് അലിയുടെ പകരക്കാരനായെത്തി മമ്മൂട്ടിക്കൊപ്പം തിളങ്ങാന്‍ അര്‍ജുന്‍ അശോകന്‍

2024ല്‍ മലയാള സിനിമ പ്രേക്ഷകര്‍ ഏറെ പ്രതീക്ഷയോടെ കാത്തിരിക്കുന്ന ചിത്രമാണ് ഭ്രമയുഗം. മമ്മൂട്ടിയെ കേന്ദ്ര കഥാപാത്രമാക്കി ഭൂതകാലം ഫെയിം രാഹുല്‍ സദാശിവന്‍ ആണ് ചിത്രം സംവിധാനം ചെയ്യുന്നത്.

ചിത്രത്തിന്‍റെ പുറത്തുവന്ന ഓരോ അപ്ഡേറ്റും പ്രേക്ഷകരെ ആകാംക്ഷയുടെ മുള്‍മുനയില്‍ നിര്‍ത്തുന്നവയാണ്. പുതുവത്സര ദിനത്തില്‍ പുറത്തുവന്ന മമ്മൂട്ടിയുടെ പോസ്റ്റര്‍ വളരെ പെട്ടന്ന് തന്നെ ചര്‍ച്ചയായി.

ഇപ്പോഴിതാ ഭ്രമയുഗത്തിലെ മറ്റൊരു സുപ്രധാന കഥാപാത്രത്തെ അവതരിപ്പിക്കുന്ന നടന്‍ അര്‍ജുന്‍ അശോകന്‍റെ ക്യാരക്ടര്‍ പോസ്റ്ററും അണിറക്കാര്‍ പുറത്തുവിട്ടു

പേടിച്ചരണ്ട് കണ്ണുമിഴിച്ച് എന്തിലേക്കോ നോക്കുന്ന അര്‍ജുന്‍റെ രൂപമാണ് പോസ്റ്ററില്‍ നല്‍കിയിരിക്കുന്നത്. പ്രഖ്യാപനം മുതല്‍ക്കെ ഭ്രമയുഗം ടീം പിന്തുടരുന്ന ബ്ലാക്ക് ആന്‍ഡ് വൈറ്റ് തീം ഇവിടെയും ആവര്‍ത്തിച്ചു.

നേരത്തെ നടന്‍ ആസിഫ് അലിയെ പരിഗണിച്ചിരുന്ന വേഷത്തിലേക്കാണ് അര്‍ജുന്‍ അശോകനെ തെരഞ്ഞെടുത്തത്. പ്രതീക്ഷിച്ചതിനെക്കാൾ നേരത്തെ ഭ്രമയു​ഗം ഷൂട്ടിം​ഗ് ആരംഭിച്ചതിനാൽ ചിത്രം ഒഴിവാക്കേണ്ടി വരികയായിരുന്നു എന്ന് ആസിഫ് അലി പറഞ്ഞിരുന്നു.

അര്‍ജുന്‍റേത് ഏറെ ശ്രദ്ധേയമായ വേഷം ആയിരിക്കും. അത്രയും പ്രതീക്ഷിച്ച് ചെയ്യണമെന്ന് കരുതിയ വേഷമായിരുന്നു അതെന്നും അര്‍ജുനിലേക്ക് തന്നെ ആ വേഷം പോയതില്‍ സന്തോഷമെന്നും ആസിഫ് കൂട്ടിച്ചേര്‍ത്തിരുന്നു. 

സിദ്ധാർത്ഥ് ഭരതനും ഒരു പ്രധാന കഥാപാത്രത്തെ ചിത്രത്തില്‍ അവതരിപ്പിക്കുന്നുണ്ട്. നൈറ്റ് ഷിഫ്റ്റ് സ്റ്റുഡിയോസ്, വൈ നോട്ട് സ്റ്റുഡിയോസ് എന്നിവയുടെ ബാനറിൽ  ചക്രവർത്തി രാമചന്ദ്രയും എസ്. ശശികാന്തും ചേര്‍ന്നാണ് ചിത്രം നിര്‍മ്മിക്കുന്നത്

ഛായാഗ്രഹണം: ഷെഹനാദ് ജലാൽ, പ്രൊഡക്ഷൻ ഡിസൈനർ: ജോതിഷ് ശങ്കർ, എഡിറ്റർ: ഷഫീക്ക് മുഹമ്മദ് അലി, സംഗീതം: ക്രിസ്റ്റോ സേവ്യർ, സംഭാഷണങ്ങൾ: ടി ഡി രാമകൃഷ്ണൻ, മേക്കപ്പ്: റോനെക്സ് സേവ്യർ, കോസ്റ്റംസ് : മെൽവി ജെ. നൈറ്റ് ഷിഫ്റ്റ് സ്റ്റുഡിയോയും YNOT സ്റ്റുഡിയോയും അവതരിപ്പിക്കുന്ന 'ഭ്രമയുഗം' മലയാളം, തമിഴ്, തെലുങ്ക്, കന്നഡ, ഹിന്ദി ഭാഷകളിൽ റിലീസ് ചെയ്യും.