Pushpa 2| രശ്മികയുടെ ശ്രീവല്ലി മരിക്കുമോ? പുഷ്പ രണ്ടാം ഭാഗത്തെ കുറിച്ച് നിർമാതാവ് പറയുന്നു

അല്ലു അർജുൻ (Allu Arjun)നായകനായ പുഷ്പയുടെ രണ്ടാം ഭാഗത്തിനായുള്ള (Pushpa 2)കാത്തിരിപ്പിലാണ് ആരാധകർ. സിനിമയുടെ ചിത്രീകരണം അടുത്ത മാസം ആരംഭിക്കുമെന്നാണ് പ്രതീക്ഷിക്കുന്നത്.

പുഷ്പ: ദി റൂൾ എന്നാണ് രണ്ടാം ഭാഗത്തിന് പേരിട്ടിരിക്കുന്നത്. ചിത്രത്തിൽ രശ്മിക മന്ദാന അവതരിപ്പിച്ച നായികാ കഥാപാത്രം ശ്രീവല്ലി മരിക്കുമെന്ന തരത്തിൽ കഴിഞ്ഞ ദിവസം വാർത്തകൾ പ്രചരിച്ചിരുന്നു.

ഇത്തരത്തിലുള്ള വാർത്തകൾക്ക് മറുപടി നൽകിയിരിക്കുകയാണ് ചിത്രത്തിന്റ നിർമാതാവ് വൈ രവി ശങ്കർ. പിങ്ക് വില്ലയ്ക്ക് നൽകിയ അഭിമുഖത്തിലാണ് പുഷ്പ രണ്ടാം ഭാഗത്തെ കുറിച്ച് നിർമാതാവ് സംസാരിച്ചത്.

സിനിമയെ കുറിച്ച് ഇപ്പോൾ ആർക്കും ഒന്നും അറിയില്ല, അതിനാൽ തന്നെ അതിനെ കുറിച്ച് എന്ത് എഴുതിയാലും ആളുകൾ വിശ്വസിക്കും. ഇത്തരം വാർത്തകൾ മറ്റ് വെബ്സൈറ്റുകളും ചാനലുകളും വാർത്ത ഏറ്റുപിടിക്കുകയും ചെയ്യും.

എന്നാൽ, ഇത്തരം വാർത്തകളെല്ലാം വ്യാജമാണെന്ന് മാത്രമാണ് തനിക്ക് പറയാനുള്ളത്. അസംബന്ധമായ വാർത്തകളാണ് ഇതൊക്കെയെന്നും നിർമാതാവ് വ്യക്തമാക്കി.

പുഷ്പയുടെ രണ്ടാം ഭാഗത്തിൽ തുടക്കത്തിൽ തന്നെ രശ്മിക അവതരിപ്പിച്ച ശ്രീവല്ലി എന്ന കഥാപാത്രം കൊല്ലപ്പെടുമെന്നായിരുന്നു വാർത്തകൾ പ്രചരിച്ചത്. കെജിഎഫ്, RRR എന്നീ ചിത്രങ്ങളിലേതു പോലെ നായികയെ കൊലപ്പെടുത്താൻ പുഷ്പയുടെ അണിയറ പ്രവർത്തകരും തീരുമാനിച്ചുവെന്നായിരുന്നു വാർത്ത.

അതേസമയം, രണ്ടാം ഭാഗത്തിലും ഫഹദ് ഫാസിലിന് മുഴുനീള റോൾ ഉണ്ടാകുമെന്നാണ് റിപ്പോർട്ടുകൾ. ഈ വർഷം അവസാനം ചിത്രം പുറത്തിറങ്ങുമെന്നാണ് പ്രതീക്ഷിക്കുന്നത്.