Rhea Chakraborty Arrest| മയക്കുമരുന്ന് കേസ്; ബോളിവുഡിലെ 25 സെലിബ്രിറ്റികൾക്കെതിരെ റിയയുടെ മൊഴി

ബോളിവുഡ് താരം സുശാന്ത് സിംഗ് രാജ്പുതിന്റെ മരണവുമായി ബന്ധപ്പെട്ട മയക്കു മരുന്ന് കേസിൽ നാർകോട്ടിക്സ് കൺട്രോൾ ബ്യൂറോ അറസ്റ്റ് ചെയ്ത റിയ ചക്രബർത്തി ബോളിവുഡിലെ 25 ഉന്നത സെലിബ്രിറ്റികളുടെ പേര് വെളിപ്പെടുത്തിയതായി സൂചന. ഔദ്യോഗിക വൃത്തങ്ങളെ ഉദ്ധരിച്ച് ദേശീയ മാധ്യമങ്ങൾ വാർത്ത റിപ്പോർട്ട് ചെയ്തിരിക്കുന്നു. 

മയക്കു മരുന്ന് ഉപയോഗിക്കുന്ന ബോളിവുഡിലെ എ, ബി, സി കാറ്റഗറിയിലുള്ള താരങ്ങളുടെ പേരുകളാണ് റിയ വെളിപ്പെടുത്തിയിരിക്കുന്നതെന്നാണ് വിവരം.

റിയയും സഹോദരൻ ഷോവിക്കും വെളിപ്പെടുത്തിയ ‘ബോളിവുഡിലെ ഉന്നത സെലിബ്രിറ്റികളെ’ എൻസിബി ഉടൻതന്നെ ചോദ്യം ചെയ്യാൻ വിളിപ്പിക്കും.

ഇവരുടെ പട്ടിക തയാറാക്കി എൻസിബിയിലെ ഉന്നത ഉദ്യോഗസ്ഥർക്ക് അയച്ചിരിക്കുകയാണെന്നും ഇവർക്ക് ഉടൻ തന്നെ സമൻസ് നൽകുമെന്നുമാണ് ലഭിക്കുന്ന വിവരങ്ങൾ.

മറ്റൊരു ലഹരിമരുന്ന് ഇടപാടുകാരനിൽ നിന്നു ലഭിച്ച ഇലക്ട്രോണിക് ഉപകരണങ്ങൾ പരിശോധിച്ചതിൽനിന്ന് റിയയുടെ വെളിപ്പെടുത്തൽ സാധൂകരിക്കുന്ന തെളിവുകൾ ലഭിച്ചിട്ടുണ്ടെന്നാണ് വിവരം.

മയക്കു മരുന്ന് കേസുമായി ബന്ധപ്പെട്ട് മൂന്നാം തവണയാണ് റിയയെ ചോദ്യം ചെയ്തത്. സുശാന്തിന്റെ സിനിമയുടെ സെറ്റിൽവെച്ച് മയക്കു മരുന്ന് ഉപയോഗിച്ചിരുന്നതായി റിയ മൊഴി നൽകിയിട്ടുണ്ട്. ഇതിന്റെ അടിസ്ഥാനത്തിൽ സുശാന്തിന്റെ സഹതാരങ്ങളെയും ചോദ്യം ചെയ്യും

കഞ്ചാവ് മാത്രമല്ല, അതിമാരക ലഹരിമരുന്നുകളും താൻ ഉപയോഗിച്ചിട്ടുണ്ടെന്നായിരുന്നു നടിയുടെ വെളിപ്പെടുത്തൽ. പല പാർട്ടികളിലും മയക്കുമരുന്ന് ഉപയോഗിച്ചിരുന്നതായും നടി സമ്മതിച്ചു.

മൂന്ന് ദിവസം നീണ്ട ചോദ്യംചെയ്യലിനൊടുവിലാണ് നടി റിയ ചക്രവർത്തിയെ നാർകോട്ടിക്സ് കൺട്രോൾ ബ്യൂറോ (എൻ.സി.ബി) അറസ്റ്റ് ചെയ്തത്.

കേസുമായി ബന്ധപ്പെട്ട് റിയയുടെ സഹോദരൻ ഷോവിക് ചക്രബർത്തി,സുശാന്തിന്റെ പാചകക്കാരൻ ദീപേഷ് സാവന്ത്, സുശാന്തിന്റെ വീടിന്റെ മാനേജർ സാമുവൽ മിരാൻഡ എന്നിവരെ നേരത്തെ അറസ്റ്റ് ചെയ്തിരുന്നു.