Salaar | ഒരു കഥാപാത്രം, ഒരേ സിനിമ, അഞ്ച് ഭാഷ; 'സലാർ' ഡബ്ബിങ് പൂർത്തിയാക്കി പൃഥ്വിരാജ്

തെലുങ്ക് സൂപ്പര്‍ താരം പ്രഭാസിനൊപ്പം മലയാളത്തിന്‍റെ സ്വന്തം പൃഥ്വിരാജ് സുകുമാരനും ഒന്നിക്കുന്ന ബ്രഹ്മാണ്ഡ ചിത്രമാണ് 'സലാര്‍ പാര്‍ട്ട് വണ്‍ സീസ് ഫയർ'.

ഡിസംബര്‍ 22ന് റിലീസ് ചെയ്യുന്ന ചിത്രത്തിനായി വമ്പന്‍ പ്രോമോഷന്‍ പരിപാടികളാണ് കേരളത്തിലുടനീളം പ്ലാന്‍ ചെയ്യുന്നത്. ഇപ്പോൾ ചിത്രത്തിന്റെ ഡബ്ബിങ് പൂർത്തിയാക്കിയ സന്തോഷം പങ്കുവെക്കുകയാണ് നടൻ പ‍ൃത്വിരാജ് സുകുമാരൻ.

അഞ്ചു ഭാഷകളിൽ ഇറങ്ങുന്ന ചിത്രത്തിലെ തന്റെ കഥാപാത്രത്തിന് അഞ്ചു ഭാഷകളിലും താൻ തന്നെ ശബ്ദം നൽകിയ സന്തോഷമാണ് പൃത്വി പങ്കുവെക്കുന്നത്. തന്റെ കരിയറിലെ ആദ്യ അനുഭവമാണിതെന്നും താരം ഇന്‍സ്റ്റാഗ്രാമിൽ പങ്കുവെച്ച കുറിപ്പിൽ പറയുന്നു.

'അവസാന ഡബ്ബിംഗ് തിരുത്തലുകൾ നടത്തി. വർഷങ്ങളായി ഞാൻ ജോലി ചെയ്തിട്ടുള്ള വിവിധ ഭാഷകളിലുടനീളമുള്ള എന്റെ എല്ലാ കഥാപാത്രങ്ങൾക്കും സ്വന്തം ശബ്ദം നൽകാനുള്ള പദവി എനിക്ക് ലഭിച്ചു. എന്റെ ചില കഥാപാത്രങ്ങൾക്ക് ഞാൻ പല ഭാഷകളിലും ഡബ്ബ് ചെയ്തിട്ടുണ്ട്. എന്നാൽ ഒരേ കഥാപാത്രത്തിന് 5 വ്യത്യസ്ത ഭാഷകളിൽ ഒരേ സിനിമയിൽ ഡബ്ബ് ചെയ്യുന്നത് എനിക്ക് ആദ്യ  അനുഭവമാണ്. തെലുങ്ക്, കന്നഡ, തമിഴ്, ഹിന്ദി, തീർച്ചയായും മലയാളം. പിന്നെ ഏത് സിനിമയ്ക്ക് വേണ്ടി ചെയ്യണം! 2023 ഡിസംബർ 22-ന് ലോകമെമ്പാടുമുള്ള തീയറ്ററുകളിൽ ദേവയും വരദയും നിങ്ങളെ കാണും!', പൃത്വിരാജ് കുറിച്ചു.

ഹോംബാലെ ഫിലിംസ് നിര്‍മ്മിക്കുന്ന ചിത്രം പൃഥ്വിരാജ് പ്രൊഡക്ഷന്‍സാണ് കേരളത്തില്‍ വിതരണത്തിന് എത്തിക്കുന്നത്. റിപ്പോര്‍ട്ടുകള്‍ പ്രകാരം മുന്നൂറിലധികം സ്ക്രീനുകളിലാണ് സലാര്‍ കേരളത്തില്‍ റിലീസ് ചെയ്യുന്നത്.

പ്രഭാസ് - ദേവ, പൃഥ്വിരാജ് - വരദരാജ മന്നാര്‍ എന്നീ കഥാപാത്രങ്ങളെയാണ് ചിത്രത്തില്‍ അവതരിപ്പിക്കുന്നത്. ശ്രുതി ഹാസനാണ് നായിക. ഗജപതി ബാബു, ബോബി സിംഹ, ഈശ്വരി റാവു, ശ്രിയ റെഡ്ഡി തുടങ്ങിയവരാണ് മറ്റ് താരങ്ങള്‍.