മഹാഭാരതം പത്ത് ഭാഗങ്ങളുള്ള സിനിമയാക്കും; സ്വപ്ന പദ്ധതിയെക്കുറിച്ച് എസ്.എസ്. രാജമൗലി

മെഗാ-ബ്ലോക്ക്ബസ്റ്റർ സിനിമയായ ആർആർആറിന് ശേഷം ചലച്ചിത്ര സംവിധായകൻ എസ് എസ് രാജമൗലി തന്റെ സ്വപ്ന പദ്ധതിയെക്കുറിച്ച് വെളിപ്പെടുത്തിയിരിക്കുന്നു. അടുത്തിടെ ഒരു അഭിമുഖത്തിലാണ് തന്റെ കരിയറിലെ സ്വപ്ന സിനിമയെക്കുറിച്ചുള്ള വെളിപ്പെടുത്തൽ അദ്ദേഹം നടത്തിയത്.

ഇന്ത്യൻ ഇതിഹാസമായ മഹാഭാരതത്തെ ആസ്പദമാക്കി ഒരു ചലച്ചിത്ര പരമ്പര തന്നെ നിർമ്മിക്കാനാണ് തന്റെ ആഗ്രഹമെന്ന് രാജമൗലി വെളിപ്പെടുത്തി. അത് 10 ഭാഗങ്ങളുള്ള സിനിമയായിരിക്കും ഇതെന്നും അദ്ദേഹം പറഞ്ഞു.

“ഞാൻ മഹാഭാരതം സിനിമയാക്കുന്ന ഒരു ഘട്ടത്തിലേയ്ക്ക് എത്തുകയാണെങ്കിൽ രാജ്യത്ത് ലഭ്യമായ മഹാഭാരതത്തിന്റെ പതിപ്പുകൾ വായിക്കാൻ മാത്രം എനിക്ക് ഒരു വർഷമെടുക്കും. നിലവിൽ ഇത് 10 ഭാഗങ്ങളുള്ള ഒരു സിനിമയായിരിക്കുമെന്ന് മാത്രമേ എനിക്ക് പറയാൻ കഴിയൂ,” തന്റെ ഭാര്യാസഹോദരൻ ഡോ. എ വി ഗുരുവ റെഡ്ഡിയോട് സംസാരിക്കവെ രാജമൗലി പറഞ്ഞതായി ഇന്ത്യൻ എക്സ്പ്രസ്സ് റിപ്പോർട്ട് ചെയ്യുന്നു.

“ഞാൻ ചെയ്യുന്ന ഓരോ സിനിമയും ആത്യന്തികമായി മഹാഭാരതം നിർമ്മിക്കാൻ വേണ്ടിയുള്ള എന്റെ പഠനത്തിന്റെ ഭാഗമാണെന്ന് ആണ് എനിക്ക് തോന്നുന്നത്, അതിനാൽ അതാണ് എന്റെ സ്വപ്നം എന്ന് കരുതുന്നു, ഓരോ ചുവടും അതിലേക്കാണ് ഞാൻ പോകുന്നത്, ” രാജമൗലി കൂട്ടിച്ചേർത്തു.

ഇതാദ്യമായല്ല മഹാഭാരതം സിനിമ ചെയ്യുന്നതിനെക്കുറിച്ച് എസ്എസ് രാജമൗലി തുറന്നു പറയുന്നത്. മഹാഭാരതം താൻ സിനിമ ആക്കുമ്പോൾ ഇപ്പോൾ എല്ലാവരും വായിച്ചതിൽ നിന്ന് വ്യത്യസ്തമായിരിക്കുമെന്നും തന്റെ സിനിമയിലെ കഥാപാത്രങ്ങളെ കൂടുതൽ 'മെച്ചപ്പെടുത്തും' എന്നും അദ്ദേഹം നേരത്തെ പറഞ്ഞിരുന്നു.

“എന്റെ മഹാഭാരതത്തിന് വേണ്ടി ഞാൻ എഴുതുന്ന കഥാപാത്രങ്ങൾ നിങ്ങൾ മുമ്പ് കണ്ടതോ വായിച്ചതോ പോലെ ആയിരിക്കില്ല. ഞാൻ എന്റേതായ രീതിയിൽ മഹാഭാരതം പറയും. മഹാഭാരതത്തിന്റെ കഥ സമാനമായിരിക്കും, എന്നാൽ കഥാപാത്രങ്ങൾ കൂടുതൽ മെച്ചപ്പെടുത്തുകയും കഥാപാത്രങ്ങൾ തമ്മിലുള്ള പരസ്പര ബന്ധങ്ങൾ എന്റെ രീതിയ്ക്ക് കൂട്ടിച്ചേർക്കുകയും ചെയ്യും, ”അദ്ദേഹം പറഞ്ഞു.

അതേസമയം തന്റെ അടുത്ത ബിഗ് ബജറ്റ് ചിത്രത്തിനായി എസ് എസ് രാജമൗലിയും മഹേഷ് ബാബുവും ഒരുങ്ങുന്നതായി അടുത്തിടെ ഒരു റിപ്പോർട്ട് പുറത്ത് വന്നിരുന്നു. പിങ്ക് വില്ല എന്ന സിനിമ പോർട്ടൽ റിപ്പോർട്ട് ചെയ്തതനുസരിച്ച് ചിത്രം സ്‌ക്രിപ്റ്റിംഗ് ഘട്ടത്തിലാണ്, ഈ വർഷം അവസാനത്തോടെ ചിത്രീകരണം ആരംഭിക്കുമെന്ന് പ്രതീക്ഷിക്കുന്നു. ഇന്ത്യൻ ഇതിഹാസമായ രാമായണത്തിൽ നിന്ന് പ്രചോദനം ഉൾക്കൊണ്ട് ആയിരിക്കും ഈ ചിത്രം ഒരുങ്ങുക എന്നാണ് റിപ്പോർട്ട്. ഹനുമാന്റെ കഥാപാത്രം ആയിരിക്കും മഹേഷ് ബാബുവിന്റേതെന്നും കരുതുന്നു. എന്നാൽ ഇത് സംബന്ധിച്ച് ഔദ്യോഗിക സ്ഥിരീകരണം നിലവിൽ വന്നിട്ടില്ല.

ആർആർആറിലെ ഹിറ്റ് ഗാനം നാട്ടു നാട്ടുവിന് ഓസ്കർ അവാർഡ് കിട്ടിയിരുന്നു. ഇന്ത്യൻ സിനിമയിലെ അടുത്ത മഹാത്ഭുതം ആയി രാജമൗലിയുടെ മഹാഭാരതം മാറുമോ എന്നാണ് സിനിമ മേഖലയിലെ പ്രധാന ചർച്ച.