'സുപ്രീം കോടതി നീതി നൽകും'; കോടതിയിൽ പ്രതീക്ഷവെച്ച് മാധ്യമ പ്രവർത്തകൻ സിദ്ദീഖ് കാപ്പന്‍റെ കുടുംബം

തിങ്കളാഴ്ച സുപ്രീം കോടതി നീതി നൽകുമെന്ന പ്രതീക്ഷയിൽ ആണ് ദില്ലിയിൽ യുഎപിഎ വകുപ്പ് ചുമത്തി അറസ്റ്റ് ചെയ്ത മലയാളി മാധ്യമ പ്രവർത്തകൻ സിദ്ദീഖ് കാപ്പന്റെ കുടുംബം

"ഞായറാഴ്ച രാത്രി ആണ് അവസാനം വിളിച്ചത്. തിങ്കളാഴ്ച ഹത്രാസിൽ പോകുന്ന കാര്യം ഒന്നും പറഞ്ഞില്ല. തിങ്കളാഴ്ച വിളിച്ചില്ല, പിന്നെ ചൊവ്വാഴ്ച രാവിലെ ആണ് പോലീസ് കസ്റ്റഡിയിൽ എടുത്ത കാര്യം വാർത്തയിൽ നിന്ന് അറിഞ്ഞത്" റൈഹാനത്ത് പറഞ്ഞു.

ചൊവ്വാഴ്ച മുതൽ ആശങ്കയുടെ കൊടുമുടിയിൽ ആണ് ഈ കുടുംബം. പലരും വിളിക്കുന്നുണ്ട്, ആശ്വസിപ്പിക്കുന്നുണ്ട്. പക്ഷേ സിദ്ദീഖിന്റെ ശബ്ദം ഒന്ന് കേൾക്കാൻ കഴിഞ്ഞെങ്കിൽ , ആരോഗ്യ സ്ഥിതി അറിയാൻ കഴിഞ്ഞെങ്കിൽ , എങ്കിൽ അല്പം സമാധാനം ആയേനെ. റൈഹാനത്ത് പറയുന്നു.

" ഷുഗർ പ്രശ്നം ഉള്ള ആൾ ആണ്. ആരോഗ്യ സ്ഥിതി മോശം ആകുമോ എന്ന് ആണ് പേടി" സിദ്ദീഖ് ഹത്രാസിൽ പോയത്ജോലിയുടെ ഭാഗമായിട്ട് ആണ് . സ്വന്തമായി വാഹനം ഇല്ലാത്തതുകൊണ്ടാണ് സുഹൃത്തുക്കളെ ആശ്രയിക്കേണ്ടി വന്നത്."

ദില്ലിയിൽ ജോലി ചെയ്യുന്ന സ്ഥാപനത്തിന് സ്വന്തമായി വാഹനം ഇല്ല. ഒരുപാട് ദൂരം പോകണം ഹത്രാസിലേക്ക് . അത് കൊണ്ടാകാം സുഹൃത്തുക്കളുടെ കൂടെ പോയത്." റൈഹാനത്ത് പറയുന്നു.

പ്രത്യേകിച്ച് ഒരു രാഷ്ട്രീയ കക്ഷികളോടും അനുഭാവം ഉള്ള ആൾ അല്ല സിദ്ദീഖ്. രാഷ്ട്രീയ താൽപര്യവും ഇല്ല . അവർ വ്യക്തമാക്കി.

പ്രതീക്ഷ സുപ്രീം കോടതിയിലാണ്. കെയുഡബ്ല്യുജെ സമർപ്പിച്ച ഹേബിയസ് കോർപ്പസ് തിങ്കളാഴ്ച പരിഗണിക്കുമ്പോൾ കോടതി എന്തുപറയും എന്നറിയാനാണ് കാത്തിരിക്കുന്നത്.

"എന്ത് തന്നെ സംഭവിച്ചാലും സിദ്ദീഖിന് നീതി ലഭിക്കും വരെ പോരാട്ടം തുടരും. ഏത് അറ്റം വരെയും പോകും " ഉറച്ച ശബ്ദത്തിൽ റൈഹാനത്ത് പറഞ്ഞു നിർത്തി

വേങ്ങരയിലെ പണിതീരാത്ത വീട്ടിൽ റൈഹാനത്തും 3 മക്കളും സിദ്ദിഖിന് വേണ്ടി പ്രാർത്ഥനയോടെ കാത്തിരിക്കുമ്പോൾ പുറത്ത് ഒരു നാടും സമൂഹവും ഈ കുടുംബത്തിനൊപ്പം ഉണ്ട്