മുണ്ടും ജുബ്ബയുമിട്ട് ഗവർണർ; ആറ്റുകാൽ പൊങ്കാല കാണാൻ ഭാര്യാസമേതം

രാജ്ഭവനിലെ സുരക്ഷാ ചട്ടങ്ങളോ പതിവ് പ്രോട്ടോകോളോ ഇല്ല, ഗവര്‍ണര്‍ ആരിഫ് മുഹമ്മദ് ഖാനും കുടുംബവുമായിരുന്നു വെള്ളയമ്പലം കവടിയാര്‍ റോഡിൽ പൊങ്കാലത്തിരക്കിനിടയിലെ ആവേശക്കാഴ്ച.

പൊങ്കാല നിവേദ്യം തയ്യാറാകുന്ന സമയമായപ്പൊഴേക്കും ഗവർണറും ഭാര്യയും രാജ്ഭവനിൽ നിന്നിറങ്ങി റോഡിലെത്തി.

ജുബ്ബയും മുണ്ടുമിട്ട ഗവർണറെ കണ്ടപ്പോൾ ഭക്തജനങ്ങൾക്കും കൗതുകം.

നിരത്ത് വക്കിൽ പൊങ്കാല നിവേദിക്കുന്നവരുമായി കുശലം പറഞ്ഞും നിവേദ്യവിവരങ്ങൾ ചോദിച്ചറിഞ്ഞും തിരക്കിലേക്ക്.

കുഞ്ഞുങ്ങളെ താലോലിച്ചു, ഫോട്ടോ എടുത്തോട്ടെ എന്ന് ചോദിച്ചവർക്കൊപ്പം ഒരു മടിയുമില്ലാതെ സെൽഫി.

മുതിർന്നവരോട് കുശലം പറഞ്ഞു ഒപ്പം മലയാളത്തിൽ ആറ്റുകാൽ പൊങ്കാല ആശംസകളും നേർന്നു.

ഒപ്പമുള്ളവർ പൊങ്കാലയുടെ പ്രത്യേകതകൾ പറഞ്ഞുകൊടുത്തു.

എന്തൊക്കയാണ് പാകം ചെയ്തതെന്ന് ചോദിച്ചറിഞ്ഞ ഗവർണർ ഭാര്യക്കും പൊങ്കാലയുടെ പ്രത്യേകതകൾ പറഞ്ഞു കൊടുത്തു.

പൊങ്കാലക്കിടെ കണ്ട സംവിധായകൻ ഷാജി കൈലാസിനെയും, ഭാര്യയും നടിയുമായ ആനിയെയും ഗവർണർ ആരിഫ് മുഹമ്മദ് ഖാൻ ഭാര്യക്ക് പരിചയപ്പെടുത്തി.

പൊങ്കാല മികച്ച അനുഭവമാണ് നൽകിയതെന്നും നാടൊന്നാകെ നിരത്തിലിറങ്ങി പൊങ്കാല അർപ്പിക്കുന്ന ഒരുമയുടെ സന്ദേശം രാജ്യമാകെ പടരട്ടെ എന്നും ഗവർണർ ആശംസിച്ചു.