പരമ്പരാ​ഗത കാനന പാതയിലൂടെ പ്രത്യേക പാസുമായെത്തിയ തീർത്ഥാടകർക്ക് ആദരം

എരുമേലി വഴിയുള്ള കാനന പാതയിലൂടെ സഞ്ചരിക്കുന്ന ഭക്തർക്ക് പ്രത്യേക ദർശനം നൽകുന്ന സംവിധാനം ഇന്ന് മുതൽ നിലവിൽ വന്നു. സന്നിധാനം എഡിഎം ഡോ അരുൺ എസ് നായർ മുക്കുഴിയിൽ പാസ് വിതരണത്തിന്റെ ഉദ്ഘാടനം നിർവഹിച്ചു.

വനംവകുപ്പ് അനുവദിച്ച പ്രത്യേക പാസുമായി കാനനപാതയിലൂടെ കാൽനടയായി എരുമേലിയിൽ നിന്നും സന്നിധാനത്ത് എത്തിച്ചേർന്ന അയ്യപ്പഭക്തരെ പതിനെട്ടാം പടിക്ക് സമീപം ശബരിമല അഡീഷണൽ ജില്ലാ മജിസ്ട്രേറ്റ് അരുൺ എസ് നായർ, പോലീസ് സ്പെഷൽ ഓഫീസർ ബി കൃഷ്ണകുമാർ എന്നിവരുടെ നേതൃത്വത്തിൽ സ്വീകരിച്ചു.

ശബരിമലയിൽ 12 മണി വരെ 45,000 ത്തോളം ഭക്തർ ദർശനം നടത്തി. പമ്പയിൽ നിന്ന് എത്തുന്ന ഭക്തർക്ക് നടപ്പന്തലിൽ ക്യൂ നിൽക്കാതെ വാവർ നടവഴി പാസ് കാണിച്ച് പതിനെട്ടാം പടി കയറാം.ഇന്നലെ 88561 ഭക്തരാണ് ദർശനം നടത്തിയത്.

അയ്യപ്പനെ കാണാൻ പുല്ലുമേട് വഴിയും എരുമേലി വഴിയും കാനന പാതയിലൂടെ കിലോമീറ്ററുകൾ നടന്നു ദർശനത്തിനെത്തുന്ന തീർത്ഥാടകർക്കായി പ്രത്യേക സംവിധാനം ഉടൻ ഒരുക്കുമെന്ന് തിരുവിതാംകൂർ ദേവസ്വം പ്രസിഡൻറ് പി എസ് പ്രശാന്ത് അറിയിച്ചിരുന്നു.

ഇത്രയും ദൂരം നടന്നുവരുന്ന ഇവർക്ക് വനം വകുപ്പുമായി സഹകരിച്ച് പ്രത്യേക ടാഗ് നൽകും. പമ്പയിൽ നിന്ന് സ്വാമി അയ്യപ്പൻ റോഡ് വഴി സന്നിധാനത്തേക്ക് വരാം. നീലിമല വഴി പോകണം എന്നുള്ളവർക്ക് ആ വഴിയുമാകാം.

മരക്കൂട്ടത്ത് വച്ച് ശരംകുത്തി വഴി ഒഴിവാക്കി ഈ തീർത്ഥാടകർക്ക് ചന്ദ്രാനന്ദൻ റോഡ് വഴി സന്നിധാനത്ത് പ്രവേശിക്കുകയും ആകാം.