Ramayana Masam 2020 | മഹാമാരിയുടെ കാലത്തും രാമായണകാല വിശുദ്ധിയിൽ തൃപ്രയാർ

തൃശ്ശൂർ : മധ്യകേരളത്തിലെ നാലമ്പല ക്ഷേത്രങ്ങളിൽ പ്രധാനപ്പെട്ടതാണ് തൃപ്രയാർ ശ്രീരാമസ്വാമി ക്ഷേത്രം. അതിനാൽ രാമായണ മാസക്കാലത്ത് ഭക്തജനങ്ങൾ ഇങ്ങോട്ട് ഒഴുകി എത്തുന്നു. ശ്രീരാമവിശ്വാസത്തിന്റെ ഏറ്റവും ഉദാത്തമായ ഭാവമാണ് തൃപ്രയാർ ക്ഷേത്രത്തിൽ. ദ്വാരകയിൽ ഭഗവാൻ ശ്രീകൃഷ്ണൻ പൂജിച്ചിരുന്ന ശ്രീരാമ വിഗ്രഹമാണ് ഇവിടെയെത്തിയത് എന്നാണ് സങ്കൽപം. കർക്കടകത്തിൽ മലയാളികളായ വിശ്വാസികൾ ഒരിക്കലെങ്കിലും പോകാൻ ആഗ്രഹിക്കുന്ന ഇടമാണ് തൃപ്രയാർ.

പഴയ തീവ്രാനദീതീരത്ത് നിറഞ്ഞുനിൽക്കുകയാണ് തൃപ്രയാറപ്പൻ. വിശ്വാസം അതിന്റെ എല്ലാ ഭാവങ്ങളോടെയും നിലനിൽക്കുന്ന ഇടം. ദ്വാരകയിൽ വാണ കൃഷ്ണനെ ആരാധിക്കുന്ന ലക്ഷങ്ങൾ. ആ ശ്രീകൃഷ്ണൻ ആരാധിച്ചിരുന്ന ശ്രീരാമ വിഗ്രഹം.

സ്വർഗാരോഹണ ശേഷം ദ്വാരകയെ മുക്കിയ പ്രളയത്തിൽ നഷ്ടമായ വിഗ്രഹം മൽസ്യത്തൊഴിലാളിക്കു കിട്ടിയെന്നും അങ്ങനെ ഇവിടെ എത്തി എന്നുമാണ് വിശ്വാസം. ഇതിനപ്പുറം നിറഞ്ഞുതുളുമ്പാനില്ല വിശ്വാസസാഗരം.

ഇവിടെ ശ്രീരാമന്റെ കൈകളിലുള്ളത് ശംഖ്, സുദർശനം, വില്ല്, മാല എന്നിവയാണ്. പഴയവിഗ്രഹത്തിൽ പഞ്ചലോഹംകൊണ്ടുള്ള ആവരണം തീർത്താണ് ഇപ്പോൾ ആരാധന.

മുന്നിലൊഴുകുന്ന പുഴയിലെ മീനൂട്ട് തൃപ്രയാറിലെ പ്രത്യേക വഴിപാടാണ്. ദക്ഷിണാമൂർത്തിയും ഗണപതിയും ശ്രീകൃഷ്ണനും ശാസ്താവുമാണ് ഇവിടെ ഉപദേവതകൾ. മഹാമാരിയുടെ കാലത്തും തൃപ്രയാറപ്പന്റെ ആചാരാനുഷ്ടാനങ്ങൾ മുടക്കമില്ലാതെ തുടരുകയാണ്.