വിശ്വാസങ്ങളെ മുറിച്ച് മാറ്റി സ്നേഹം കൊണ്ട് ഒന്നായി; ഭർത്താക്കന്മാർക്കായി വൃക്ക പരസ്പരം ദാനം ചെയ്ത് ഹിന്ദു- മുസ്ലീം സ്ത്രീകള്‍

ഭര്‍ത്താക്കന്‍മാർക്കായി പരസ്പരം വൃക്ക ദാനം ചെയ്ത് ഹിന്ദു മുസ്ലിം സ്ത്രീകൾ. മുബൈയിലെ ആശുപത്രിയിലാണ് രണ്ട് മതക്കാരായ സ്ത്രീകൾ പരസ്പരം സഹായമായത്.

താനെ സ്വദേശിയായ നസ്രീൻ പാട്ടീലും ബിഹാർ സ്വദേശിയായ സത്യ ദേവിയുമാണ് ഭർത്താക്കന്മാർക്കായി വൃക്ക പരസ്പരം ദാനം ചെയ്തത്.

നസ്രീന്റെ ഭർത്താവ് നദീമും സത്യ ദേവിയുടെ ഭർത്താവ് രാംസ്വർത്തും സെയ്ഫി ഹോസ്പിറ്റലിലെ ഡോ. ഹെമാൽ ഷായുടെ ചികിത്സയിലായിരുന്നു.

പരിശോധനയിലാണ് നസ്രീനും രാംസ്വർത്തും ഒരേ രക്ത ഗ്രൂപ്പും( എ ) സത്യദേവിയും നദീമും ഒരേ ഗ്രൂപ്പും( ബി) ആണെന്ന് കണ്ടെത്തിയത്.

ഹെമാൽ ഷായാണ് വൃക്ക പരസ്പരം കൈമാറുന്ന ആശയം മുന്നോട്ടുവെച്ചത്. ഒരു മാസം നീണ്ട ചർച്ചകൾക്കു ശേഷം ഇരു കുടുംബങ്ങളും ഇത് അംഗീകരിക്കുകയായിരുന്നു.

മാർച്ച് 14 ലോക വൃക്ക ദിനത്തിനായിരുന്നു ശസ്ത്രക്രിയ നടന്നത്. ശസ്ത്രക്രിയ വിജയകരമായിരുന്നു.