കേരളത്തിൽ നിന്ന് ഒറ്റ ദിവസം കൊണ്ട് ട്രെയിനിൽ എങ്ങനെ മുംബൈയിലെത്താം ?

കേരളത്തിൽ നിന്ന് ഒറ്റ ദിവസം കൊണ്ട് ട്രെയിനിൽ മുംബൈയിലെത്താം. കേട്ട് ഞെട്ടിയോ, എന്നാൽ ഞെട്ടെണ്ട!. ബാഗ് റെഡിയാക്കിക്കോ, ഒറ്റ ദിവസത്തിൽ മുംബൈയിലെത്താൻ. അതും വന്ദേ ഭാരത് എക്സ്പ്രസിൽ. എങ്ങനെയാണെന്നല്ലേ... നോക്കാം. ഇതിനായി രണ്ട് ട്രെയിൻ സർവീസാണ് ഉപയോഗപ്പെടുത്താവുന്നത്.

മംഗലാപുരം-ഗോവ വന്ദേ ഭാരതും ഗോവ-മുംബൈ വന്ദേഭാരത് സർവീസും ആണ് അത്. മംഗലാപുരത്തു നിന്നു ഗോവയിലെത്തി അവിടുന്ന് ഒന്ന് ഫ്രഷായി അടുത്ത വന്ദേ ഭാരതിൽ കയറി മുംബൈയിലെത്താം.

എങ്ങനെ യാത്ര പ്ലാൻ ചെയ്യാമെന്ന് നോക്കാം: രാവില മംഗലാപുരത്ത് എത്തിയാൽ അവിടെ നിന്ന് മംഗലാപുരം-മഡ്ഗാവോൺ വന്ദേ ഭാരത് എക്സ്പ്രസിൽ യാത്ര ചെയ്യാം. ഇതിന്റെ സമയക്രമം മഡ്ഗാവോണിൽ നിന്ന് മുംബൈയിലേക്കുള്ള വന്ദേ ഭാരത് കിട്ടുന്ന തരത്തിലാണ് ക്രമീകരിച്ചിരിക്കുന്നത്.

അങ്ങനെ രാവിലെ 8.30ന് മംഗലാപുരം സെൻട്രൽ റെയിൽവേ സ്റ്റേഷനിൽ നിന്നാരംഭിക്കുന്ന മംഗലാപുരം-ഗോവ വന്ദേ ഭാരത് ട്രെയിൻ (20646) 4 മണിക്കൂർ 45 മിനിറ്റ് യാത്രയ്ക്കൊടുവിൽ ഉച്ചയ്ക്ക് 1.15ന് മഡ്ഗാവോണിൽ എത്തിച്ചേരും. വ്യാഴാഴ്ച ഒഴികെയുള്ള ദിവസങ്ങളിലാണ് ഈ ട്രെയിൻ സർവീസ് നടത്തുന്നത്. എസി ചെയർ കാറിൽ 1330 രൂപയും എക്സിക്യൂട്ടീവ് ചെയർ കാറിന് 2350 രൂപയുമാണ് നിരക്ക്.ഉഡുപ്പി, കർവാർ എന്നിവിടങ്ങളിലാണ് സ്റ്റോപ്പ്.

ഇവിടെ ഉച്ചയ്ക്ക് എത്തിയാൽ ഒന്നു വിശ്രമിച്ച് ഇരിക്കുമ്പോഴേക്കും ഗോവ- മുംബൈ വന്ദേ ഭാരത് ട്രെയിൻ എത്തും. ഇവിടെ നിന്ന് പിന്നീട് മുംബൈയിൽ രാത്രിയോടെ എത്താൻ വേണ്ടിയുള്ള പറക്കലാണ്. മഡ്ഗാവോണില്‍ നിന്നും ഉച്ചകഴിഞ്ഞ് 2.40ന് ഗോവ-മുംബൈ വന്ദേ ഭാരത് (22230) ട്രെയിൻ പുറപ്പെടും. 7 മണിക്കൂർ 45 മിനിറ്റ് യാത്രയ്ക്കൊടുവിൽ രാത്രി 10.25ന് ട്രെയിൻ ഛത്രപതി ശിവജി ടെർമിനസ് റെയിൽവേ സ്റ്റേഷനിലെത്തും.

വ്യാഴാഴ്ച ഒഴികെയുള്ള ദിവസങ്ങളിലാണ് ഈ ട്രെയിൻ സർവീസ് നടത്തുന്നത്. എസി ചെയർ കാറിൽ 1745 രൂപയും എക്സിക്യൂട്ടീവ് ചെയർ കാറിന് 3295 രൂപയുമാണ് നിരക്ക്.കൻകാവാലി, രത്നഗിരി, പൻവേൽ, താനെ, തുടങ്ങയവയാണ് പ്രധാന സ്റ്റോപ്പുകൾ. പിന്നെ നിങ്ങളുടെ സൗകര്യത്തിൽ മുംബൈ കറങ്ങി മടങ്ങാം.

ഇനി തിരികെ വന്ദേ ഭാരത് ട്രെയിനു തന്നെയാണ് വരുന്നതെങ്കിൽ യാത്ര ഇങ്ങനെ പ്ലാൻ ചെയ്യാം.ഛത്രപതി ശിവജി ടെർമിനസ് റെയിൽവേ സ്റ്റേഷനിൽ നിന്ന് രാവിലെ 5.25ന് പുറപ്പെടുന്ന മുംബൈ-ഗോവ വന്ദേ ഭാരത് (22229) ട്രെയിൻ 7 മണിക്കൂർ 45 മിനിറ്റ് യാത്രയ്ക്കൊടുവിൽ ഉച്ചയ്ക്ക് 1.10ന് മഡ്ഗാവോൺ റെയിൽവേ സ്റ്റേഷനിൽ എത്തിച്ചേരും. വെള്ളിയാഴ്ച ഒഴികെയുള്ള ദിവസങ്ങളിലാണ് ഈ ട്രെയിൻ സർവീസ് നടത്തുന്നത്.

എസി ചെയർ കാറിൽ 1745 രൂപയും എക്സിക്യൂട്ടീവ് ചെയർ കാറിന് 3295 രൂപയുമാണ് നിരക്ക്. മഡ്ഗാവോണിൽ നിന്നും മംഗലാപുരത്തേയ്ക്ക് വൈകിട്ട് 6.10ന് എടുക്കുന്ന മഡ്ഗാവോൺ-മംഗലാപുരം വന്ദേ ഭാരത് 20645 ട്രെയിൻ രാത്രി 10.45 ന് മംഗളുരു സെൻട്രൽ റെയിൽവേ സ്റ്റേഷനിൽ എത്തിച്ചേരും, 4 മണിക്കൂർ 35 മിനിറ്റാണ് യാത്രാ സമയം.

കേരളത്തിൽ നിന്നും അതിരാവിലെ മംഗലാപുരത്തെത്തിയാൽ മേല്‌പ്പറഞ്ഞ പോലെ ഗോവയിലെത്തി അവിടുന്ന് മുംബൈയ്ക്ക് പോകാം. കേരളത്തിൽ നിന്നും മംഗലാപുരത്തേയ്ക്ക് നിരവധി ട്രെയിനുകൾ സർവീസ് നടത്തുന്നുണ്ട്.