കൊച്ചി: ഒരാഴ്ചയായി തുടരുന്ന സ്വർണ വിലയിലെ കുതിപ്പ് പുതിയ ഉയരങ്ങളിൽ. സ്വര്‍ണ വില പവന് 40,000ത്തിൽ എത്തി. ഇന്ന് പവന് 280 രൂപ കൂടിയതോടെയാണ് പവൻ വില 40,000 രൂപയിൽ എത്തിയത്. ഗ്രാമിന് 35 രൂപ കൂടി 5000 രൂപയായി. കഴിഞ്ഞ കുറേ ദിവസങ്ങളായി തുടർച്ചയായി വർധനയാണ് സ്വർണവിലയിൽ രേഖപ്പെടുത്തുന്നത്. ഇന്നലെ പവന് 320 രൂപ വര്‍ധിച്ച് 39,720 രൂപയിലെത്തിയിരുന്നു. അന്താരാഷ്ട്ര വിപണിയില്‍ ഒരു ട്രോയ് ഔണ്‍സ് (31.1 ഗ്രാം) തനിത്തങ്കത്തിന്റെ വില സ്ഥിരതയാര്‍ജിച്ചു. 1,958.99 ഡോളര്‍ നിലവാരത്തിലാണ് വ്യാപാരം നടക്കുന്നത്. കോവിഡ് വ്യാപനത്തെതുടര്‍ന്നുള്ള ആഗോള സാമ്പത്തിക പ്രതിസന്ധിമൂലം സുരക്ഷിത നിക്ഷേപമെന്ന നിലയില്‍ സ്വര്‍ണത്തില്‍ നിക്ഷേപകര്‍ വിശ്വാസമര്‍പ്പിച്ചതാണ് വിലയെ സ്വാധാനിച്ചിരിക്കുന്നത്. അന്താരാഷ്ട്ര വിപണിയിലെ വില വർധനയാണ് കേരളത്തിലും പ്രതിഫലിക്കുന്നത്. ദേശീയ വിപണിയില്‍ 10 ഗ്രാം തനിത്തങ്കത്തിന് 53,216 നിലവാരത്തിലെത്തി. വെള്ളിവിലയിലും വര്‍ധനവുണ്ടായി. കിലോഗ്രമിന് 865 രൂപ വര്‍ധിച്ച് 63,355 രൂപയായി. ഒരാഴ്ചകൊണ്ട് 2200 രൂപയാണ് സ്വർണവിലയിൽ ഉയർന്നത്.
