ഡാരില്‍ മിച്ചൽ; 48 വർഷത്തിനു ശേഷം ലോകകപ്പിൽ ഇന്ത്യക്കെതിരെ സെഞ്ചുറി നേടുന്ന ന്യൂസിലന്റ് താരം

ലോകകപ്പിൽ ഇന്ത്യയ്‌ക്കെതിരേ ന്യൂസിലൻ‍ഡിനെ ഭേദപ്പെട്ട സ്കോറിലേക്ക് നയിച്ചത് ഡാരില്‍ മിച്ചലിന്റെ പ്രകടനമായിരുന്നു.ലോകകപ്പില്‍ ഇന്ത്യയ്‌ക്കെതിരേ സെഞ്ചുറി നേടുന്ന രണ്ടാമത്തെ മാത്രം ന്യൂസീലന്‍ഡ് താരമെന്ന നേട്ടവും ഇതോടെ ഡാരില്‍ മിച്ചലിനെ തേടിയെത്തി.

ഡാരില്‍ മിച്ചലിന്റെയും രചിൻ രവീന്ദ്രയുടേയും കൂട്ടുകെട്ടിലൂടെയാണ് ഒരു ഘട്ടത്തില്‍ രണ്ടിന് 19 റണ്‍സെന്ന നിലയിലേക്ക് കൂപ്പുകുത്തിയ കിവീസിനെ 273 റൺസെന്ന പൊരുതാവുന്ന സ്‌കോറലെത്തിച്ചത്.

ലോകകപ്പിൽ ആദ്യ സെഞ്ചുറി നേടിയ ഡാരില്‍ മിച്ചലിന് മറ്റൊരു അപൂര്‍വ നേട്ടവും സ്വന്തം പേരിൽ കുറിക്കാനായി. 48 വര്‍ഷത്തിനു ശേഷം ലോകകപ്പില്‍ ഇന്ത്യയ്‌ക്കെതിരെ സെഞ്ചുറി നേടുന്ന ന്യൂസീലന്‍ഡ് താരമെന്ന നേട്ടമാണ് ഡാരില്‍ മിച്ചലിനെ തേടിയെത്തിയത്.

1975-ലെ പ്രഥമ ലോകകപ്പില്‍ ഇന്ത്യയ്‌ക്കെതിരെ ഗ്ലെന്‍ ടര്‍ണറാണ് ആദ്യമായി സെഞ്ചുറി നേടിയത്. പിന്നീട് മറ്റാർക്കും ഈ നേട്ടത്തിലേക്കെത്താൻ ആയില്ല. മാഞ്ചെസ്റ്ററില്‍ ഇന്ത്യയ്‌ക്കെതിരെ 114 റണ്‍സായിരുന്നു ഗ്ലെന്‍ ടര്‍ണര്‍ നേടിയത്.

എന്നാൽ ഇന്ത്യക്കെതിരെ 127 പന്തില്‍നിന്ന് അഞ്ച് സിക്‌സും ഒമ്പത് ഫോറുമടക്കം 130 റണ്‍സാണ് മിച്ചല്‍ അടിച്ചുകൂട്ടിയത്. ഇതോടെ ലോകകപ്പില്‍ ഇന്ത്യയ്‌ക്കെതിരേ ഒരു കിവീസ് താരത്തിന്റെ ഉയര്‍ന്ന സ്‌കോര്‍ എന്ന നേട്ടവും മിച്ചലിന് സ്വന്തമായി.