India vs Pakistan T20 World Cup| 'ഇന്ത്യ-പാക് മത്സരങ്ങളുടെ യഥാർത്ഥ ദൃശ്യം'; പാക് താരങ്ങളുമായി സൗഹൃദ നിമിഷങ്ങൾ പങ്കിട്ട് കോഹ്‌ലിയും ധോണിയും; കയ്യടിച്ച് ക്രിക്കറ്റ് ലോകം

ഐസിസി ലോകകപ്പിലെ ഏറ്റവും ആവേശകരമായ പോരാട്ടത്തിന് ശേഷം ദൃശ്യമായത് കായിക രംഗത്തെ ഏറ്റവും മനോഹരമായ ദൃശ്യങ്ങൾ. ചിരവൈരികൾ എന്ന മുദ്രകുത്തപ്പെട്ട ഇന്ത്യയുടെയും പാക്കിസ്ഥാന്റെയും ടീമിലെ കളിക്കാർ മത്സരത്തിന് ശേഷം സൗഹൃദ നിമിഷങ്ങൾ പങ്കിടുന്ന കാഴ്ചയാണ് കാണാൻ കഴിഞ്ഞത്. മത്സരത്തിൽ ഇന്ത്യക്കെതിരെ പാകിസ്ഥാൻ വിജയറൺ നേടിയപ്പോൾ ഇന്ത്യൻ ക്യാപ്റ്റൻ കോഹ്ലി പാക് ബാറ്റർമാരായ മുഹമ്മദ് റിസ്വാനെയും ബാബർ അസമിനെയും പുഞ്ചിരിയോടെ അഭിനന്ദിക്കുന്ന കാഴ്ചയാണ് കണ്ടത്.

ഇതിന് ശേഷം ഇന്ത്യൻ ടീമിന്റെ മെന്ററായ മഹേന്ദ്ര സിങ് ധോണിക്കൊപ്പം സംസാരിച്ച് നിൽക്കുന്ന പാക് താരങ്ങളായ ബാബർ അസം, ഷൊയിബ് മാലിക്, ഇമാദ് വസിം എന്നിവരുടെ ചിത്രവും ആരാധകർക്കിടയിൽ വലിയ ശ്രദ്ധ നേടി.

പാകിസ്ഥാൻ വിജയറൺ കുറിച്ച വേളയിൽ പാക് ഓപ്പണർ മുഹമ്മദ് റിസ്വാനെ പുഞ്ചിരിയോടെ ചേർത്ത് നിർത്തുന്ന വിരാട് കോഹ്‌ലിയുടെ ചിത്രം ഇതിനോടകം സമൂഹ മാധ്യമങ്ങളിൽ എല്ലാം തന്നെ ആരാധകർ ഏറ്റെടുത്ത് കഴിഞ്ഞിട്ടുണ്ട്. സ്പിരിറ്റ് ഓഫ് ക്രിക്കറ്റ് എന്ന ഹാഷ്ടാഗിൽ ചിത്രം ട്വിറ്ററിൽ തരംഗമായി കൊണ്ടിരിക്കുകയാണ്.

ലോകകപ്പിലെ സൂപ്പർ 12ൽ പാകിസ്ഥാനെതിരെ 10 വിക്കറ്റിന്റെ തോൽവിയാണ് ഇന്ത്യ വഴങ്ങിയത്. ഇന്ത്യയെ തോൽപ്പിച്ച പാക്കിസ്ഥാൻ ലോകകപ്പ് വേദിയിൽ ഇന്ത്യക്കെതിരെ അവരുടെ ആദ്യ ജയം കൂടിയാണ് കുറിച്ചത്.

ഇന്ത്യ കുറിച്ച 152 റൺസ് പിന്തുടർന്ന് ഇറങ്ങിയ പാകിസ്ഥാൻ 17.5 ഓവറിൽ തന്നെ ലക്ഷ്യം കണ്ടു. ക്യാപ്റ്റൻ ബാബർ അസമിന്റെയും (52 പന്തിൽ 68) മുഹമ്മദ് റിസ്വാന്റെയും (55 പന്തിൽ 72) അർധസെഞ്ചുറി പ്രകടനങ്ങളാണ് അവരുടെ ജയം എളുപ്പമാക്കിയത്.

ഇന്ത്യ - പാക് മത്സരങ്ങളുടെ യഥാര്‍ത്ഥ ദൃശ്യം ഇതാണെന്നായിരുന്നു കമന്ററിയില്‍ ഹര്‍ഷ ബോഗ്ലെ പറഞ്ഞത്.

ഒക്ടോബര്‍ 31 ന് ന്യൂസിലന്‍ഡിനെതിരെയാണ് ഇന്ത്യയുടെ അടുത്ത മത്സരം. പാകിസ്ഥാനെതിരെ തോൽവി വഴങ്ങിയാൽ കിവീസിനെതിരായ മത്സരം ഇന്ത്യക്ക് നിർണായകമാണ്.