അച്ഛന് മകന്റെ ഗംഭീര സമ്മാനം; റിങ്കു സിങ് വാങ്ങി നൽകാൻ പോകുന്ന കാർ ഏത് ?

ഇന്ത്യൻ ക്രിക്കറ്റ് പ്രേമികളുടെ മനസ്സിൽ റിങ്കു സിങ് സ്റ്റാറാണ്. ഇന്ത്യന്‍ ക്രിക്കറ്റിന്‌ ലഭിച്ച പുതുതലമുറയിലെ മികച്ച വാഗ്ദാനമാണ്‌ റിങ്കു എന്നാണ് ആരാധകർ പറയുന്നത്.

രഞ്ജി ട്രോഫിയില്‍ യു.പി.ക്കുവേണ്ടിയും ഐ.പി.എലില്‍ കൊല്‍ക്കത്ത നൈറ്റ് റൈഡേഴ്‌സിനു വേണ്ടിയും മികച്ച പ്രകടനം പുറത്തെടുത്തതിനു പിന്നാലെ കഴിഞ്ഞ വര്‍ഷമാണ് താരം ഇന്ത്യയുടെ സീനിയര്‍ ടീമിലെത്തുന്നത്.

കഴിഞ്ഞ വർഷം ഇടംകൈയ്യൻ സീമർ യാഷ് ദയാലിനെ ഒരോവറിൽ അഞ്ച് സിക്‌സറുകൾ പറത്തി ഗുജറാത്ത് ടൈറ്റൻസിനെതിരെ കൊൽക്കത്ത നൈറ്റ് റൈഡേഴ്‌സിന് തകർപ്പൻ ജയം നേടിക്കൊടുത്തതോടെയാണ് റിങ്കു ശരിക്കും സ്റ്റാറായത്.

ഉത്തർപ്രദേശിലെ അലിഗഢ് ജില്ലയിലെ ഒരു സാധാരണ കുടുംബത്തില്‍ നിന്നാണ് റിങ്കു സിങ് വരുന്നത്. മകന്‍ പ്രശസ്തിയുടെ ഉന്നതിയില്‍ എത്തിനില്‍ക്കുമ്പോഴും ഇപ്പോഴും ഒരു സാധാരണക്കാരന്‍റെ ജീവിതം നയിക്കുന്നയാളാണ് റിങ്കുവിന്‍റെ അച്ഛന്‍.

ഒരു വീട്ടിൽ എൽപിജി സിലിണ്ടറുകൾ വിതരണം ചെയ്യുന്ന താരത്തിന്‍റെ പിതാവ് ഖാൻചന്ദ്ര സിംഗിന്‍റെ വീഡിയോയാണ് സമൂഹമാധ്യമങ്ങളില്‍ ചര്‍ച്ചയാകുന്നത്.

മകന്‍ ഇന്ത്യന്‍ ക്രിക്കറ്റ് താരമായിരുന്നിട്ടും അച്ഛന്‍ പഴയ ജോലി ഉപേക്ഷിക്കാന്‍ തയ്യാറാകാത്ത അച്ഛനെ പിന്തുണച്ച് കൊണ്ടാണ് വീഡിയോ സാമൂഹിക മാധ്യമങ്ങള്‍ ഏറ്റെടുത്തത്. പിതാവിനോട് ജോലി ഉപേക്ഷിച്ച് വിശ്രമിക്കാന്‍ ആവശ്യപ്പെട്ടിരുന്നെങ്കിലും അദ്ദേഹം അതിന് തയ്യാറായിരുന്നില്ലെന്ന് റിങ്കുതന്നെ പലതവണ പറഞ്ഞിട്ടുണ്ട്.

ഇപ്പോഴിതാ അച്ഛന് ഗംഭീര സമ്മാനം ഒരുക്കിയിരിക്കുകയാണ് താരം. മൂന്ന് കോടി രൂപയാണ് ഇന്ത്യയുടെ പുതിയ ബാറ്റിങ് സെന്‍സേഷന്‍ റിങ്കു സിങ്ങിന് ഉത്തര്‍പ്രദേശ് സര്‍ക്കാര്‍ പാരിതോഷികം പ്രഖ്യാപിച്ചത്. ആ പണം ഉപയോഗിച്ച് തന്റെ പിതാവിന് കാര്‍ വാങ്ങി നല്‍കാന്‍ പോവുകയാണ് താരം.

ഏഷ്യന്‍‌ ഗെയിംസില്‍ മെഡല്‍ നേടിയ ഇന്ത്യന്‍ ക്രിക്കറ്റ് സംഘത്തില്‍ ഉള്‍പ്പെട്ടതിനാണ് റിങ്കു സിങ്ങിന് ഉത്തര്‍പ്രദേശ് സര്‍ക്കാര്‍ മൂന്ന് കോടി പാരിതോഷികം പ്രഖ്യാപിച്ചത്. ഇതോടെ ഏത് കാറാണ് താരം അച്ഛന് വേണ്ടി വാങ്ങാൻ പോകുന്നത് എന്നാണ് ആരാധകർ ചോദിക്കുന്നത്.