Ayodhya | 'രാമക്ഷേത്ര നിർമ്മാണത്തോടെ ഇന്ത്യയിൽ 'രാമ രാജ്യം'സ്ഥാപിക്കപ്പെടും'; പ്രത്യാശ പങ്കുവച്ച് ബാബ രാംദേവ്

'ഇന്ത്യ ഒരു പുതുചരിത്രം കുറിക്കാൻ ഒരുങ്ങുകയാണ്.. ഈ ദിനം നമ്മള്‍‌ ആഘോഷിക്കണം.. രാമക്ഷേത്ര നിർമ്മാണത്തോടെ രാജ്യത്ത് രാമരാജ്യം സ്ഥാപിക്കപ്പെടുമെന്ന് എനിക്ക് ഉറപ്പുണ്ട്' രാംദേവ് പറഞ്ഞതായി എഎൻഐ റിപ്പോർട്ട് ചെയ്യുന്നു.

കോവിഡ് നിയന്ത്രണങ്ങളുടെ പശ്ചാത്തലത്തിൽ വളരെക്കുറച്ച് ആളുകൾക്ക് മാത്രമാണ് തറക്കല്ലിടൽ ചടങ്ങിന് ക്ഷണമുള്ളത്. കഴിഞ്ഞ ദിവസമാണ് ഇതിൽ പങ്കെടുക്കാൻ രാംദേവ് അയോധ്യയിലെത്തിയത്. ചരിത്രപരമായ ദിനമാണ് ഇന്ന് (ആഗസ്റ്റ് 5) എന്നാണ് അദ്ദേഹം പറയുന്നത്. വരും തലമുറകൾ ഈ ദിവസം അഭിമാനത്തോടെ ഓർക്കുമെന്നും കൂട്ടിച്ചേർത്തു. 'സാംസ്കാരിക-സാമ്പത്തിക-രാഷ്ട്രീയ പ്രശ്നങ്ങളുടെ കടന്നു കയറ്റത്തിന് അവസാനം കുറിക്കുന്ന ദിനം കൂടിയാണിന്ന്.. രാമക്ഷേത്ര നിർമ്മാണം രാജ്യത്ത് ഒരു പുതുസംസ്കാരത്തിന് തുടക്കം കുറിക്കുമെന്നും രാംദേവ് വ്യക്തമാക്കി.

തറക്കല്ലിടൽ ചടങ്ങിനായെത്തുന്ന പ്രധാനമന്ത്രിയെ അഭിനന്ദിക്കാനും രാംദേവ് മറന്നില്ല.. 'ഇങ്ങനെയൊരു പ്രധാനമന്ത്രിയ ലഭിച്ചത് നമ്മുടെ രാജ്യത്തിന്‍റെ ഭാഗ്യമാണ്.. ഹൈന്ദവധർമ്മത്തിന്‍റെ അഭിമാനം ഉയർത്തിയ വ്യക്തി കൂടിയാണ് രാം-ഹനുമാൻ ഭക്തൻ കൂടിയായ പ്രധാനമന്ത്രി.. എന്നായിരുന്നു വാക്കുകൾ..