ചായ വീണ്ടും വീണ്ടും ചൂടാക്കി കുടിക്കുന്നത് ആരോ​ഗ്യത്തിന് നല്ലതാണോ?

ചായ കുടിച്ചുകൊണ്ടാണ് പലരുടെയും ഒരു ദിവസം ആരംഭിക്കുന്നത്. ചിലർ ദിവസത്തിൽ നാലോ അഞ്ചോ തവണ ചായ കുടിക്കും. ചെറിയ തലവേദന ഉണ്ടാകുമ്പോഴോ, വിഷമിക്കുമ്പോഴോ, സുഹൃത്തുക്കളെ കാണുമ്പോഴോ പോലും ചായ കുടിക്കാറുണ്ട്.

ഒരിക്കൽ തയ്യാറാക്കിയ ചായ വീണ്ടും വീണ്ടും ചൂടാക്കി കുടിക്കുന്നത് സാധാരണമാണ്. എന്നാൽ, ഈ ശീലം നല്ലതല്ലെന്നാണ് ഡോക്ടർമാർ പറയുന്നത്. ജേണൽ ഓഫ് ഫുഡ് സയൻസിൽ പ്രസിദ്ധീകരിച്ച ഒരു പഠനത്തിൽ പറയുന്നത് ചായ വീണ്ടും ചൂടാക്കി കുടിക്കുന്നത് 5 തരം ആരോഗ്യ പ്രശ്നങ്ങൾക്ക് കാരണമാകുമെന്നാണ്. അവ എന്തൊക്കെയാണെന്ന് നമുക്ക് നോക്കാം.

രുചിയിൽ മാറ്റം: ചായ വീണ്ടും ചൂടാക്കുമ്പോൾ അതിലെ ടാനിനുകളുടെ സാന്ദ്രത വർദ്ധിക്കുന്നു. ഇത് പാനീയത്തെ കൂടുതൽ കയ്പ്പുള്ളതും അസിഡിറ്റി ഉള്ളതുമാക്കുന്നു. ഈ ടാനിനുകൾ ശരീരത്തിലെ ധാതുക്കളുടെ ആഗിരണത്തെ തടസ്സപ്പെടുത്തുന്നു. വീണ്ടും ചൂടാക്കിയ ചായ കുടിക്കുന്നത് നമ്മുടെ ദഹനവ്യവസ്ഥയിൽ അസ്വസ്ഥത, ദഹനക്കേട്, പോഷകാഹാരക്കുറവ്, മറ്റ് രോഗങ്ങൾ എന്നിവയ്ക്ക് കാരണമാകും.

ദഹനപ്രശ്നങ്ങൾ: ചായ ഇടയ്ക്കിടെ ചൂടാക്കിയാൽ അതിന്റെ അസിഡിറ്റി വർദ്ധിക്കും. ഇത് നെഞ്ചെരിച്ചിൽ, ​ഗ്യാസ്ട്രബിൾ അല്ലെങ്കിൽ ആസിഡ് റിഫ്ലക്സ് പോലുള്ള പ്രശ്നങ്ങൾ വർദ്ധിപ്പിക്കും. ആസിഡ് സംവേദനക്ഷമതയുള്ള ആളുകൾക്ക് വീണ്ടും ചൂടാക്കിയ ചായ കുടിച്ചാൽ വയറു വീർക്കുകയോ അസ്വസ്ഥത അനുഭവപ്പെടുകയോ ചെയ്യാം. ദഹനസംയുക്തങ്ങളുടെ സന്തുലിതാവസ്ഥയെ ഇത് ബാധിക്കുന്നു.

ചായ ഉണ്ടാക്കിയ ശേഷം റൂമിലെ താപനിലയിൽ കൂടുതൽ നേരം വെച്ചാൽ, അതിൽ ബാക്ടീരിയകൾ വളരാൻ സാധ്യതയുണ്ട്. ഇത് നമ്മുടെ ആരോഗ്യത്തിന് ദോഷകരമാണ്. ഇങ്ങനെ വളരുന്ന ബാക്ടീരിയകളെ ചായ വീണ്ടും ചൂടാക്കിയാലും നശിപ്പിക്കാൻ കഴിയില്ല. ഇത്തരത്തിലുള്ള ചായ കുടിക്കുന്നത് ഭക്ഷ്യജന്യ രോഗങ്ങൾക്കുള്ള സാധ്യത വർദ്ധിപ്പിക്കും. അതുകൊണ്ട്, ചായ ഉണ്ടാക്കി കുറഞ്ഞ സമയത്തിനുള്ളിൽ തന്നെ കുടിക്കാൻ ശ്രദ്ധിക്കുക.

ചായ വീണ്ടും ചൂടാക്കുന്നത് അതിലടങ്ങിയ ആരോഗ്യദായകമായ ആന്റിഓക്‌സിഡന്റുകളെ നശിപ്പിക്കുന്നു. കാറ്റെച്ചിനുകൾ, പോളിഫെനോളുകൾ തുടങ്ങിയ ആന്റിഓക്‌സിഡന്റുകളാൽ സമ്പന്നമാണ് ചായ. ഇത് ശരീരത്തിലെ വീക്കം (Inflammation) കുറയ്ക്കാൻ സഹായിക്കുന്നു. കൂടാതെ, ഹൃദയാരോഗ്യം നിലനിർത്തുന്നു. കോശങ്ങളെ കേടുപാടുകളിൽ നിന്ന് സംരക്ഷിക്കുന്നു. എന്നാൽ, ചായ വീണ്ടും ചൂടാക്കുമ്പോൾ ഈ സംയുക്തങ്ങൾ നശിച്ചുപോകുന്നു. തൽഫലമായി, വീണ്ടും ചൂടാക്കിയ ചായ കുടിക്കുന്നതുകൊണ്ട് ആരോഗ്യപരമായ വലിയ ഗുണങ്ങളൊന്നും ലഭിക്കുന്നില്ല. അതിനാൽ, ചായ എപ്പോഴും ഉണ്ടാക്കിയ ഉടൻ കുടിക്കുന്നതാണ് ഉചിതം.

ചായ വീണ്ടും ചൂടാക്കുന്നത് അതിന്റെ രുചി, മണം, രാസഘടന എന്നിവയിൽ മാറ്റങ്ങൾ വരുത്തും. ഇത് ആരോഗ്യത്തെ ദോഷകരമായി ബാധിക്കാൻ സാധ്യതയുണ്ട്. പ്രത്യേകിച്ചും, നിലവാരമില്ലാത്ത പാത്രങ്ങളാണ് വീണ്ടും ചൂടാക്കാൻ ഉപയോഗിക്കുന്നതെങ്കിൽ, ഉയർന്ന താപനിലയിൽ ആ പാത്രങ്ങളിലെ ചില രാസവസ്തുക്കൾ ചായയിലേക്ക് കലരാൻ സാധ്യതയുണ്ട്. ഇങ്ങനെ, ചായയുടെ രുചിയും സ്വാദും മോശമാവുന്നു. ഇവ ശരീരത്തിൽ എത്തുന്നത് ആരോഗ്യത്തിന് ദോഷകരമായി ബാധിക്കുകയും ചെയ്യും.

ചില സാഹചര്യങ്ങളിൽ ചായ വീണ്ടും ചൂടാക്കേണ്ടിവന്നാൽ ചില നുറുങ്ങുവിദ്യകൾ പ്രയോ​ഗിക്കാം. ചായ ഉണ്ടാക്കിയ ശേഷം ആദ്യത്തെ 15 മിനിറ്റിനുള്ളിൽ വീണ്ടും ചൂടാക്കുന്നതിൽ വലിയ ദോഷമില്ല. വീണ്ടും ചൂടാക്കേണ്ട സാഹചര്യം ഒഴിവാക്കാനായി, നിങ്ങൾക്ക് ആവശ്യമുള്ള അളവിൽ മാത്രം ചായ ഉണ്ടാക്കുക. ഉണ്ടാക്കിയ ചായ പാത്രങ്ങളിലോ, തെർമോസുകളിലോ, ഇൻസുലേറ്റഡ് ഫ്ലാസ്കുകളിലോ ഒഴിക്കുക. ഇവ ചായയെ കുറഞ്ഞത് ഏതാനും മണിക്കൂറുകൾ ചൂടോടെ നിലനിർത്താൻ സഹായിക്കും.വീണ്ടും ചൂടാക്കുന്നത് ഒഴിവാക്കാനാവില്ലെങ്കിൽ, അത് സ്റ്റൗവിൽ വെച്ച് വളരെ സൗമ്യമായി മാത്രം ചൂടാക്കാൻ ശ്രദ്ധിക്കുക. ഈ ലളിതമായ കാര്യങ്ങൾ ശ്രദ്ധിച്ചാൽ ചായയുടെ ഗുണനിലവാരം നിലനിർത്താനും ബാക്ടീരിയൽ പ്രശ്നങ്ങൾ ഒഴിവാക്കാനും സാധിക്കും.

മുകളിൽ നൽകിയിരിക്കുന്ന എല്ലാ വിവരങ്ങളും ഗവേഷണ കണ്ടെത്തലുകളെ അടിസ്ഥാനമാക്കിയുള്ളതാണ്.