'ഹാപ്പിയായിട്ടാണ് ഇപ്പോൾ പോകുന്നത്; ഏത് സാഹചര്യത്തെയും നേരിടാനാകും': നടി വരദ

താൻ ഇപ്പോൾ വളരെ സന്തോഷത്തോടെയാണ് ജീവിക്കുന്നതെന്ന് വരദ പറയുന്നു. ജീവിതത്തിലെ ഏത് സാഹചര്യങ്ങളെയും കൈകാര്യം ചെയ്യാൻ തനിക്ക് കഴിയുമെന്നും, എല്ലാ മനുഷ്യരെയും പോലെ തനിക്കും സങ്കടങ്ങൾ വരുമെങ്കിലും അതിൽ നിന്ന് വേഗം പുറത്തുവരുമെന്നും അവർ കൂട്ടിച്ചേർത്തു.

"ഞാൻ വളരെ ഹാപ്പിയായിട്ടാണ് ഇപ്പോൾ പോകുന്നത്. അടിസ്ഥാനപരമായി ഞാൻ വളരെ ഹാപ്പി പേഴ്സണാണ്. എപ്പോഴും സന്തോഷമായിരിക്കാനാണ് ശ്രമിക്കുന്നത്. സങ്കടം വരാറില്ലേ എന്ന് ചോദിച്ചാൽ, മനുഷ്യനല്ലേ സങ്കടമൊക്കെ ഉണ്ടാവും. ആ സമയത്ത് സങ്കടം വന്നാൽ സങ്കടപ്പെടും, അത് കഴിഞ്ഞാൽ വളരെ പെട്ടെന്ന് അതിൽ നിന്ന് പുറത്തു കടക്കാനും എനിക്ക് സാധിക്കാറുണ്ട്."- അവർ കൂട്ടിച്ചേർത്തു.

2006 ൽ പുറത്തിറങ്ങിയ വാസ്‍തവം എന്ന മലയാള ചിത്രത്തിലൂടെയാണ് വരദ നടിയായി അരങ്ങേറ്റം കുറിച്ചത്. പൃഥ്വിരാജിന്റെ ഇളയ അനുജത്തിയുടെ വേഷമായിരുന്നു ഈ ചിത്രത്തിൽ. ആദ്യമായി നായികയായി അഭിനയിച്ചത് 2008 ൽ പുറത്തിറങ്ങിയ സുൽത്താൻ എന്ന മലയാള ചിത്രത്തിലായിരുന്നു. സീരിയലുകളിലൂടെയാണ് വരദ കൂടുതൽ പ്രശസ്തയായത്. എമിമോൾ എന്നാണ് വരദയുടെ യഥാർത്ഥപേര്. തൃശൂർ ആണ് സ്വദേശം. പ്രശസ്ത സംവിധായകൻ ലോഹിതദാസ് ആണ് എമിമോൾക്ക് വരദ എന്ന പേര് നിർദേശിച്ചത്.