ഇങ്ങനെ പണി എടുക്കണ്ടാ, സ്വസ്ഥമായി ഉറങ്ങിക്കോളൂ! തൊഴിലാളികൾക്ക് ഉറങ്ങാൻ അവധി നൽകുന്ന കമ്പനി

ബെംഗളൂരു ആസ്ഥാനമായി പ്രരവര്‍ത്തിക്കുന്ന ഹോം ആൻഡ് സ്ലീപ്പ് സൊല്യൂഷൻസ് കമ്പനിയായ ‘വേക്ക് ഫിറ്റ് സൊല്യൂഷൻസ്’ ആണ് തൊഴിലാളികൾക്ക് അവധി നൽകിയിരിക്കുന്നത്. ‘സർപ്രൈസ് ഹോളിഡേ: അനൗൺസിംഗ് ദി ഗിഫ്റ്റ് ഓഫ് സ്ലീപ്പ്’ എന്നായിരുന്നു ജീവനക്കാർക്ക് അയച്ച മെയിലിന്റെ തലക്കെട്ട്.

‘ലോക നിദ്രാ ദിനത്തിൽ, എല്ലാ വേക്ക്ഫിറ്റ് ജീവനക്കാർക്കും 2023 മാർച്ച് 17 -ന് ഒരു വിശ്രമ ദിനം അനുവദിച്ചിട്ടുണ്ട്. വാരാന്ത്യത്തോട് ചേർന്നുവരുന്ന ഈ അവധി ദിനം കൊതി തീരെ വിശ്രമിക്കാനുള്ള മികച്ച അവസരമാണ്’ എന്ന കുറിപ്പോടെയാണ് കമ്പനി ജീവനക്കാർക്ക് അവധി നല്‍കിയിരിക്കുന്നത്.

ഉറക്കക്കുറവിനെ പ്രാധാന്യത്തോടെ കാണുന്നതിന്റെ ഭാ​ഗമായാണ് നിദ്രാദിനത്തിൽ തന്നെ ഈ തീരുമാനം എടുത്തതെന്നാണ് കമ്പനി പറയുന്നത്. നേരത്തേ പ്രവൃത്തിസമയത്ത് അര മണിക്കൂർ മയങ്ങാൻ അനുമതി നൽകിയും കമ്പനി വാർത്തയിൽ ഇടംപിടിച്ചിരുന്നു.