ആറ് വർഷം കൊണ്ട് അടച്ചുതീർത്തത് 53 ലക്ഷം രൂപയുടെ ഭവനവായ്പ; സാമ്പത്തിക അച്ചടക്കത്തെക്കുറിച്ചുള്ള പോസ്റ്റ് വൈറൽ

വലിയ തുക വായ്പ എടുത്തത് മൂലമുണ്ടാകുന്ന വൈകാരികവും മാനസികവുമായ സമ്മർദത്തെക്കുറിച്ച് ടെക്കി വായനക്കാർക്ക് മുന്നറിയിപ്പ് നൽകി. ''നിങ്ങൾ അമിതമായി ചിന്തിക്കുന്നയാളോ ഉത്കണ്ഠയുള്ളയാളോ ആണെങ്കിൽ ഭവനവായ്പ എടുക്കുന്നത് ഒഴിവാക്കുക. കടുത്ത മാനസികസമ്മർദ്ദത്തിലാകാൻ സാധ്യതയുണ്ട്,'' യുവാവ് വ്യക്തമാക്കി.

വളരെയധികം സമ്മർദം ഉണ്ടായിരുന്നിട്ടും വായ്പ എടുത്തത് ചില പോസിറ്റീവായ നേട്ടങ്ങളും നല്‍കിയെന്ന് ടെക്കി സമ്മതിച്ചു. ഭവന വായ്പ ലഭിച്ചത് തന്നെ കൂടുതൽ കഠിനാധ്വാനം ചെയ്യാനും ബോണസ് നേടാനും പണം കൂടുതൽ ഫലപ്രദമായി കൈകാര്യം ചെയ്യാനും പ്രേരിപ്പിച്ചതായി അദ്ദേഹം പറഞ്ഞു.

വളരെപ്പെട്ടെന്നാണ് യുവാവിന്റെ പോസ്റ്റ് സോഷ്യൽ മീഡിയയിൽ ശ്രദ്ധ നേടിയത്. ടെക്കിയുടെ സ്ഥിരോത്സാഹത്തെയും പ്രതിബദ്ധതയെയും നിരവധി പേരാണ് പ്രശംസിച്ചത്. ''അഭിനന്ദനങ്ങൾ സുഹൃത്തെ. നിങ്ങൾ കൈവരിച്ചത് ഒരു സാധാരണ നേട്ടമല്ല, അത് വലിയൊരു കാര്യമാണ്,'' ഒരാൾ പറഞ്ഞു. ''ഇത് വലിയൊരു നാഴികക്കല്ലാണെന്ന് മറ്റൊരാൾ പറഞ്ഞു. ഞാനും ഇപ്പോൾ ഒരു വായ്പ അടച്ചുകൊണ്ടിരിക്കുകയാണ്. അതെ ഇത് അൽപം തിരക്കു പിടിച്ച അവസ്ഥയാണ്,'' അദ്ദേഹം പറഞ്ഞു.