'ഞാൻ പെണ്ണല്ല, ആൺകുട്ടിയാ'; ആനന്ദ് മഹീന്ദ്രയെ തിരുത്തി കളരിപ്പയറ്റ് അഭ്യാസിയായ മലയാളി ബാലൻ

പ്രമുഖ വ്യവസായി ആനന്ദ് മഹീന്ദ്രയ്ക്ക് സംഭവിച്ച ചെറിയൊരു പിഴവ് തിരുത്തിയിരിക്കുകയാണ് കളരിപ്പയറ്റ് അഭ്യാസിയായ ഒരു മലയാളി ബാലൻ. വൈറലാകുന്ന തരത്തിലുള്ള വീഡിയോയും ഫോട്ടോയുമൊക്കെ ആനന്ദ് മഹീന്ദ്ര ട്വിറ്ററിൽ ഷെയർ ചെയ്യാറുണ്ട്. അസാധാരണ കഴിവ് പ്രകടിപ്പിക്കുന്നവരെക്കുറിച്ചാണ് അദ്ദേഹം കൂടുതലും ട്വീറ്റ് ചെയ്യാറുള്ളത്. ഇത്തരത്തിൽ കഴിഞ്ഞ ദിവസം പങ്കുവെച്ച ഒരു കളരിപ്പയറ്റ് വീഡിയോയിൽ പെൺകുട്ടിയാണെന്ന് തെറ്റിദ്ധരിച്ച് ആനന്ദ് നൽകിയ ക്യാപ്ഷനെ തുടർന്നാണ് നീലകണ്ഠൻ എന്ന മലയാളി ബാലൻ തിരുത്തലുമായി രംഗത്തെത്തിയത്. ഇതേത്തുടർന്ന് തെറ്റ് തിരുത്താനും ഖേദം പ്രകടിപ്പിക്കാനും തയ്യാറായി ആനന്ദ് മഹീന്ദ്ര രംഗത്തെത്തി.