പ്രണയിക്കാൻ പ്രായം പ്രശ്നമല്ലെന്ന് ഈ മുതിർന്ന ദമ്പതികൾ

പ്രണയിക്കാനും വിവാഹിതരാകാനും പ്രായം ഒരു പ്രശ്നമേ അല്ലെന്ന് തെളിയിക്കുകയാണ് ജർമ്മനിയിൽ നിന്നുള്ള മുതിർന്ന ദമ്പതികളായ ഇൻഗോയും എൽക്കും (Ingo and Elke). പാരീസിലെ തെരുവോരത്തിലൂടെ സംസാരിച്ചുകൊണ്ട് ഉല്ലസിച്ച് നടന്നുവരുന്ന നവ ദമ്പതികളുടെ വീഡിയോ ക്രിസ്റ്റഫർ വാർഡ് എന്ന ഫോട്ടോഗ്രാഫർ പകർത്തി ഇൻസ്റ്റാഗ്രാമിൽ പോസ്റ്റ് ചെയ്തിരുന്നു. ഇരുവരും നടന്ന് വരുന്നത് കണ്ട് കൌതുകം തോന്നിയ വാർഡ് ഇവരുടെ വീഡിയോ പകർത്തുകയായിരുന്നു. പാരിസിൽ നിന്ന് തന്നെയാണോ എന്ന് ചോദിച്ചുകൊണ്ട് സംസാരിച്ചു തുടങ്ങുന്ന വാർഡിനോട് തങ്ങൾ ജർമ്മനിയിൽ നിന്നാണെന്നും വിവാഹം കഴിഞ്ഞിട്ട് രണ്ട് ആഴ്ചയെ ആയിട്ടുള്ളു എന്നും ഹണിമൂൺ ആഘോഷിക്കാനാണ് പാരീസിലേക്കെത്തിയതെന്നും മുതിർന്ന നവദമ്പതികൾ പറയുന്നതും വീഡിയോയിൽ കാണാം. ഇരുവരും എങ്ങനെയാണ് കണ്ടുമുട്ടിയതെന്നും വിവാഹിതരായതെന്നും എൽക്ക് വീഡിയോയിൽ പങ്കുവെയ്ക്കുന്നുണ്ട്.