പട്ടിണി കിടന്ന് കോളേജില്‍ ചേര്‍ന്ന യുവാവ് ഓണ്‍ലൈന്‍ ഗെയിമില്‍ 22,000 രൂപ നഷ്ടമായതിന് ജീവനൊടുക്കാന്‍ ശ്രമിച്ചു

പലതരത്തിലുള്ള സൈബര്‍ തട്ടിപ്പ് കേസുകള്‍ നമ്മുടെ നാട്ടില്‍ മിക്ക ദിവസങ്ങളിലും റിപ്പോര്‍ട്ട് ചെയ്യാറുണ്ട്. വിര്‍ച്വല്‍ അറസ്റ്റ് മുതല്‍ ഓണ്‍ലൈന്‍ ഗെയിമിംഗ് തട്ടിപ്പുവരെ റിപ്പോര്‍ട്ട് ചെയ്യപ്പെടുന്നു. പ്രായമായവരും ചെറുപ്പക്കാരുമെല്ലാം ഇതിനുള്ളില്‍ കുടുങ്ങി പോയ സംഭവങ്ങള്‍ നിരവധിയാണ്. ഇപ്പോഴിതാ പട്ടിണി കിടന്ന് പോലും കോളേജിലെ ഫീസ് അടച്ചുകൊണ്ടിരുന്ന യുവാവ് ഓണ്‍ലൈന്‍ ഗെയിമിംഗ് തട്ടിപ്പിന് ഇരയായി 22,000 രൂപ നഷ്ടപ്പെട്ട സംഭവമാണ് ചര്‍ച്ചയായിരിക്കുന്നത്. ഇയാള്‍ ജീവനൊടുക്കാന്‍ ശ്രമിച്ചതായി സുഹൃത്ത് സോഷ്യല്‍ മീഡിയയില്‍ പങ്കുവെച്ച പോസ്റ്റില്‍ പറഞ്ഞു. ''എന്റെ സുഹൃത്ത് 22,000 രൂപയുടെ ഓണ്‍ലൈന്‍ തട്ടിപ്പിന് ഇരയായി. തുടര്‍ന്ന് ജീവനൊടുക്കാന്‍ ശ്രമിച്ചു,'' സുഹൃത്ത് സാമൂഹിക മാധ്യമമായ റെഡ്ഡിറ്റില്‍ പങ്കുവെച്ച പോസ്റ്റില്‍ പറഞ്ഞു. ഒരു മുറിയുള്ള ഒരു ഫ്‌ളാറ്റില്‍ താനും ജീവനൊടുക്കാന്‍ ശ്രമിച്ച സുഹൃത്തും ഒന്നിച്ചാണ് താമസമെന്ന് അയാള്‍ പറഞ്ഞു. ഒരു ദിവസം വൈകുന്നേരം ഏഴ് മണിയോടെ സുഹൃത്തിനെ പല തവണ ഫോണില്‍ വിളിച്ചുവെന്നും എന്നാല്‍ മറുപടി ലഭിച്ചില്ലെന്നും യുവാവ് പറഞ്ഞു.