കേരളത്തിൽ വച്ച് മോഷണം പോയ എയർപോഡുമായി കള്ളൻ ഗോവയിൽ; കണ്ടെത്താൻ സഹായം അഭ്യർത്ഥിച്ച് യുവാവ്

യാത്രയ്ക്കിടെ മോഷണം പോയ എയർപോഡ് (AirPod) കണ്ടെത്താൻ സഹായം അഭ്യർത്ഥിക്കുന്ന പോസ്റ്റുമായി യുവാവ്. എക്സ് ഉപയോക്താവായ നിഖിലാണ് കേരളത്തിൽ വച്ച് നഷ്ടമായ തന്റെ എയർപോഡ് കണ്ടെത്താൻ ആളുകളുടെ സഹായം അഭ്യർത്ഥിച്ച് പോസ്റ്റിട്ടത്. ലൊക്കേഷൻ ട്രാക്കർ (Location Tracker) ഉപയോഗിച്ച് നടത്തിയ അന്വേഷണത്തിൽ തന്റെ എയർപോഡ് ഇപ്പോൾ സൗത്ത് ഗോവയിൽ (South Goa) ഉള്ളതായി കണ്ടെത്തിയെന്ന് നിഖിൽ പറയുന്നു. രണ്ട് ദിവസമായി എയർപോഡ് ഇവിടെ തന്നെയാണ് സ്ഥലം കാണിക്കുന്നതെന്നും അതുകൊണ്ട് തന്നെ എയർപോഡ് അവിടെ താമസിക്കുന്ന ആരുടെയോ കയ്യിൽ ഉണ്ടെന്നും നിഖിൽ പറയുന്നു. സൗത്ത് ഗോവയിലെ സാൽസീറ്റിലുള്ള ഡോ. അൽവാരോ ഡി ലൊയോളാ ഫുർട്ടാടോ റോഡിന് ( Dr. Alvaro de Loyola Furtado Road ) അടുത്തായിട്ടാണ് എയർപോഡിന്റെ ലൊക്കേഷൻ കാണിക്കുന്നതെന്നും, അതിന് സമീപം താമസിക്കുന്നവർ ആരെങ്കിലും ഉണ്ടോ എന്ന് ചോദിച്ചു കൊണ്ടാണ് നിഖിൽ തന്റെ എക്സ് അക്കൗണ്ടിൽ കുറിപ്പ് പോസ്റ്റ്‌ ചെയ്തത്.