ഗർഭകാലത്ത് ഭാര്യയെ തനിച്ചാക്കി മാറിതാമസിക്കുന്ന ഭർത്താവ്; 'ഇത് സാധാരണമാണോ?' എന്ന് യുവതി

ഓഫീസിലെ ആഘോഷങ്ങൾക്കിടയിൽ 'കെ' എന്ന് വിളിക്കുന്ന മുപ്പതുകളോട് അടുപ്പിച്ച് പ്രായമുള്ള ഒരു സഹപ്രവർത്തകൻ വളരെ സങ്കടത്തിൽ ഇരിക്കുന്നത് ശ്രദ്ധയിൽപ്പെട്ടു. അദ്ദേഹത്തിന്റെ ഭാര്യ ഗർഭിണിയാണെന്നും അടുത്ത മാസം പ്രസവമാണെന്നും മറ്റൊരു സഹപ്രവർത്തകൻ വെളിപ്പെടുത്തി. എല്ലാവരും അദ്ദേഹത്തെ അഭിനന്ദിച്ചെങ്കിലും, ഭാര്യ അദ്ദേഹത്തോടൊപ്പമാണോ താമസമെന്ന ചോദ്യത്തിന് അദ്ദേഹം നൽകിയ മറുപടി എല്ലാവരെയും ഞെട്ടിച്ചു.

"ഇല്ല സർ, അവൾ നാട്ടിൽ അവളുടെ വീട്ടുകാരോടൊപ്പമാണ്. ഈ ആശുപത്രിയിൽ കൊണ്ടുപോകുന്ന കാര്യങ്ങളും ഗർഭകാലത്ത് സ്ത്രീകൾ പരാതി പറയുന്ന മറ്റ് കാര്യങ്ങളും ആര് നോക്കും? എനിക്ക് അതിന് കഴിയില്ല. അതുകൊണ്ട് അവൾ അവളുടെ മാതാപിതാക്കളുടെ കൂടെ നിൽക്കുന്നതാണ് നല്ലത്," കെ പറഞ്ഞു.

കൂടാതെ അദ്ദേഹം കൂട്ടിച്ചേർത്തു: "അവൾക്ക് രാവിലെ എഴുന്നേൽക്കുമ്പോൾ ഛർദ്ദിയും തലവേദനയും ഒക്കെ ഉണ്ടാകാറുണ്ട്. വീട്ടിലെ ജോലികളൊന്നും ചെയ്യാൻ അവൾക്ക് കഴിയുന്നില്ലായിരുന്നു."

ജോലിത്തിരക്ക് കാരണം തനിക്ക് അവളെ ഒറ്റയ്ക്ക് നോക്കാൻ കഴിയില്ലെന്നും, ഗർഭം സ്ഥിരീകരിച്ച ഉടനെ അവളെ നാട്ടിലേക്ക് അയച്ചുവെന്നുമാണ് അദ്ദേഹം വിശദീകരിച്ചത്. താൻ തന്റെ പഴയ 'ബാച്ചിലർ' ജീവിതം ആസ്വദിക്കുകയാണെന്നും അദ്ദേഹം പറഞ്ഞു.

ഈ കുറിപ്പ് പങ്കുവെച്ച യുവതി പറയുന്നത്, നേരത്തെ ആ ഭാര്യ അദ്ദേഹത്തോടൊപ്പം താമസിച്ചിരുന്നു എന്നാണ്. ഗർഭിണിയായ ഉടനെ അവരെ നാട്ടിലേക്ക് അയച്ചു. ഇപ്പോൾ അദ്ദേഹം വീട്ടിൽ പാർട്ടികൾ നടത്തുകയും ബാച്ചിലർ ജീവിതം ആസ്വദിക്കുകയുമാണ്.

"ഒന്നിച്ച് ജീവിക്കാനും ഒന്നിച്ച് കുഞ്ഞുങ്ങളെ വളർത്താനും കഴിയില്ലെങ്കിൽ പിന്നെ എന്തിനാണ് വിവാഹം കഴിക്കുന്നത്? ഗർഭകാലം എന്നത് സ്ത്രീയുടെ മാത്രം ഉത്തരവാദിത്തമാണോ?" അവർ ചോദിക്കുന്നു. ആ ഓഫീസിലെ ആറ് വിവാഹിതരായ പുരുഷ മാനേജർമാരിൽ എല്ലാവരും തങ്ങളുടെ ഭാര്യമാരെ നാട്ടിലോ മാതാപിതാക്കളുടെ അടുത്തോ നിർത്തി നഗരത്തിൽ ബാച്ചിലർ ജീവിതം നയിക്കുന്നവരാണെന്നും അവർ വെളിപ്പെടുത്തി.

സോഷ്യൽ മീഡിയയിൽ ഇതിനെതിരെ വലിയ പ്രതിഷേധമാണ് ഉയരുന്നത്.

"ഇങ്ങനെയുള്ള പുരുഷന്മാരെ കാണുമ്പോഴാണ് സ്ത്രീകൾക്ക് വിവാഹത്തോടും കുട്ടികളോടും മടുപ്പ് തോന്നുന്നത്," എന്ന് ഒരാൾ കുറിച്ചു.

മറ്റൊരു കമന്റ് ഇങ്ങനെയായിരുന്നു: "കുഞ്ഞ് ജനിച്ച് മൂന്നാം ദിവസം ബാച്ചിലർ ട്രിപ്പ് പോയ ഒരാളെ എനിക്കറിയാം. തന്റെ ഭാര്യ കുഞ്ഞിനെ നോക്കിക്കൊള്ളും എന്നാണ് അയാൾ പറഞ്ഞത്."

"നിങ്ങളുടെ വംശം നിലനിർത്താൻ കുഞ്ഞുങ്ങളെ പ്രസവിക്കാൻ മാത്രമാണ് നിങ്ങൾ ഭാര്യയെ കാണുന്നത്," എന്ന് മറ്റൊരാൾ വിമർശിച്ചു.

"ഇത് എങ്ങനെ സാധാരണമാകും? നിങ്ങൾ ഒന്നിച്ച് ആസൂത്രണം ചെയ്തതാണെങ്കിൽ ആ ഉത്തരവാദിത്തം ഒന്നിച്ച് നിറവേറ്റണ്ടേ?" എന്ന ചോദ്യത്തോടെയാണ് അവർ കുറിപ്പ് അവസാനിപ്പിച്ചത്.