'എന്റെ ജീവിതം നശിപ്പിക്കുന്നു'; ഐഫോണ്‍ 15 വാങ്ങിത്തരില്ലെന്നു പറഞ്ഞ അച്ഛനോട് പതിനൊന്നുകാരി

സോഷ്യല്‍ മീഡിയ പ്ലാറ്റ്‌ഫോമായ റെഡ്ഡിറ്റിലെ കുറിപ്പാണ് വൈറലാകുന്നത്. ഐഫോണ്‍ 15 ആവശ്യപ്പെട്ട മകളോട് അത് വാങ്ങിത്തരാന്‍ കഴിയില്ലെന്ന് അച്ഛന്‍ പറഞ്ഞു.

ഇതോടെ അച്ഛന്‍ തന്റെ ജീവിതം നശിപ്പിക്കുകയാണെന്ന് തഗ്ഗ് ഡയലോഗടിച്ചിരിക്കുകയാണ് 11കാരിയായ മകള്‍. ഈ അനുഭവമാണ് അച്ഛന്‍ റെഡ്ഡില്‍ പങ്കുവെച്ചത്.

'' എനിക്ക് 11 വയസ്സുള്ള മകളുണ്ട്. ഐഫോണ്‍ 8 ആണ് അവള്‍ ഉപയോഗിക്കുന്നത്. സുഹൃത്തുക്കളെ വിളിക്കാനും സോഷ്യല്‍ മീഡിയ ഉപയോഗിക്കാനുമായാണ് അവള്‍ ഫോണ്‍ ഉപയോഗിക്കുന്നത്. ഈയടുത്തായി തനിക്ക് ഐഫോണ്‍ 15 വേണമെന്ന് അവള്‍ എന്നോട് ആവശ്യപ്പെട്ടു. തന്റെ ഫോണ്‍ പഴയതാണെന്നും സുഹൃത്തുക്കള്‍ക്കെല്ലാം തന്നേക്കാള്‍ പുതിയ ഫോണ്‍ ആണുള്ളതെന്നും മകള്‍ പറഞ്ഞു. ഇതുകേട്ടതോടെ അവള്‍ക്ക് ഐഫോണ്‍ 13 വാങ്ങിക്കൊടുക്കാമെന്ന് ഞങ്ങള്‍ കരുതി. അതാകുമ്പോള്‍ 600 ഡോളര്‍ മാത്രമല്ലെ വിലവരികയുള്ളുവെന്ന് കരുതി,'' അച്ഛന്‍ പറയുന്നു.

എന്നാല്‍ ഐഫോണ്‍ 15 ആണ് തനിക്ക് വേണ്ടതെന്ന് മകള്‍ വ്യക്തമായി പറയുകയായിരുന്നുവെന്നും ഇദ്ദേഹം പറയുന്നു. എന്നാല്‍ വളരെ വിലകൂടിയ ഫോണാണ് ഐഫോണ്‍ 15. അതൊരു അനാവശ്യ ചെലവാണെന്നാണ് അച്ഛന്റെ പക്ഷം.

'' എന്റെ മകള്‍ ഒരു ഗെയിമറാണ്. പഴയഫോണില്‍ ഗെയിം കളിക്കാനാകുന്നില്ലെന്ന് അവള്‍ എപ്പോഴും പരാതി പറയുമായിരുന്നു. അതുകൊണ്ടാണ് ഐഫോണ്‍ 13 വാങ്ങിക്കൊടുക്കാമെന്ന് വിചാരിച്ചത്. എന്നാല്‍ അതിന്റെ ഇരട്ടിവിലയുള്ള ഐഫോണ്‍ 15 ആണ് തനിക്ക് വേണ്ടതെന്ന് മകള്‍ പറഞ്ഞു,'' അച്ഛന്‍ പറയുന്നു.

നിരവധി പേരാണ് അച്ഛന്റെ പോസ്റ്റിന് കമന്റുമായി എത്തിയത്. ഒരു കാരണവശാലും മകളുടെ ആവശ്യത്തിന് മുന്നില്‍ വഴങ്ങരുതെന്ന് പലരും കമന്റ് ചെയ്തു.

'' ആരാണ് ഇതില്‍ രക്ഷകര്‍ത്താവ്? ഒരിക്കലും മകളുടെ ആവശ്യത്തിന് മുന്നില്‍ വഴങ്ങരുത്. ഐഫോണ്‍ 13 ഒരു നല്ല ഓപ്ഷന്‍ തന്നെയാണ്,'' എന്നാണ് ഒരാള്‍ കമന്റ് ചെയ്തത്.

'' പതിനൊന്നുകാരിയ്ക്ക് 1000 ഡോളറിന്റെ ഫോണ്‍ ഇപ്പോള്‍ ആവശ്യമില്ല,'' എന്ന് മറ്റൊരാള്‍ കമന്റ് ചെയ്യുകയും ചെയ്തു.