ക്വാണ്ടം ചിപ്പുകള്‍ ഉണ്ടാക്കാനറിയാമോ? കേന്ദ്രസര്‍ക്കാരിന് നിങ്ങളെ ആവശ്യമുണ്ട്

തിരഞ്ഞെടുക്കപ്പെടുന്ന സ്ഥാപനം സര്‍ക്കാരിനുവേണ്ടി കൊളാബറേറ്റീവ് ഡെവലപ്‌മെന്റ് പാര്‍ട്ണര്‍(സിഡിപി) ആയി പ്രവര്‍ത്തിക്കും. തദ്ദേശീയമായി ക്വാണ്ടം കമ്പ്യൂട്ടറുകള്‍ വികസിപ്പിക്കുന്നതായി ഏപ്രിലില്‍ ക്വാണ്ടം ടെക്‌നോളജീസ് ആന്‍ഡ് ആപ്ലിക്കേഷനുകള്‍ സംബന്ധിച്ച 6000 കോടിയുടെ ദേശീയ പദ്ധതി രൂപവത്കരിച്ചതിന് പിന്നാലെയാണ് ഈ നീക്കം. ഗവേഷണത്തിനായി ഇന്ത്യയും യുഎസും സംയുക്തമായി ഇന്‍ഡോ-യുഎസ് ക്വാണ്ടം കോര്‍ഡിനേഷന്‍ സംവിധാനം സ്ഥാപിച്ചിട്ടുണ്ട്.

ഏറ്റവും നൂതനമായ സൂപ്പര്‍ കമ്പ്യൂട്ടറുകളേക്കാള്‍ 100 ദശലക്ഷം മടങ്ങ് വേഗതയാണ് ക്വാണ്ടം കംപ്യൂട്ടറുകള്‍ക്ക് ഉള്ളത്. കേന്ദ്ര ഐടി മന്ത്രാലയത്തിന് കീഴില്‍ പ്രവര്‍ത്തിക്കുന്ന സി-ഡാക്കിനാണ്(C-DAC) ഈ ‘ക്വാണ്ടം’ സംരംഭത്തിന്റെ ചുമതല നല്‍കിയിരിക്കുന്നത്. ”ക്വാണ്ടം ചിപ്പുകളുടെ പര്യവേഷണങ്ങള്‍ക്കും മറ്റ് പ്രവര്‍ത്തനങ്ങള്‍ക്കും സി-ഡാക്കിനാണ് ചുമതല നല്‍കിയിരിക്കുന്നത്. ഈ മേഖലയിലെ വെല്ലുവിളികള്‍ പരിഹരിക്കാന്‍ ക്വാണ്ടം കംപ്യൂട്ടിങ് സജ്ജമാണ്. സി-ഡാക് ക്വാണ്ടം കംപ്യൂട്ടര്‍ നിര്‍മിക്കും. ഇതില്‍ ക്വാണ്ടം പ്രൊസസിങ് ചിപ്പ് നിര്‍ണായ പങ്ക് വഹിക്കും”, ന്യൂസ് 18-ന് ലഭിച്ച രേഖയില്‍ പറയുന്നു.

തെരഞ്ഞെടുക്കപ്പെടുന്ന സ്റ്റാര്‍ട്ടപ്പുകളുമായി തുടക്കം മുതല്‍ അവസാനം വരെ സഹകരിക്കാനാണ് സര്‍ക്കാര്‍ ലക്ഷ്യമിടുന്നത്. മൂന്ന് വര്‍ഷം വരെയായിരിക്കും കരാര്‍ കാലാവധി. വികസിപ്പിച്ചെടുക്കുന്ന ക്വാണ്ടം ചിപ്പ് ഫലപ്രദമായി പരീക്ഷണം നടത്തണം. കൂടാതെ കരുത്തുറ്റതുമായിരിക്കണം.