ഐഎഎസ് തേടുന്നവരെ പറ്റിക്കുന്ന പരസ്യങ്ങൾ നൽകിയ 20 കോച്ചിങ് സെന്ററുകൾക്കെതിരെ നടപടിയുമായി കേന്ദ്രം

തെറ്റിദ്ധരിപ്പിക്കുന്ന പരസ്യങ്ങൾ നൽകിയ രാജ്യത്തെ ഐഎഎസ് പരിശീല സ്ഥാപനങ്ങൾക്കെതിരെ നടപടിയുമായി കേന്ദ്രം. പരീക്ഷയിൽ ഉയർന്ന റാങ്ക് നേടുന്നവർ തങ്ങളുടെ പൂർവ വിദ്യാർത്ഥികളാണെന്ന തരത്തിൽ ഇവർ പരസ്യം ചെയ്തിരുന്നു. നാല് കോച്ചിങ് സ്ഥാപനങ്ങൾക്ക് ഒരു ലക്ഷം രൂപ വീതം പിഴ ചുമത്തിയിട്ടുണ്ട്. മറ്റുള്ളവർക്കെതിരെ എന്തു നടപടിയെടുക്കണം എന്ന കാര്യം ആലോചിച്ചു വരികയാണ്. സെൻട്രൽ കൺസ്യൂമർ പ്രൊട്ടക്ഷൻ അതോറിറ്റി ( Central Consumer Protection Authority (CCPA)) ആണ് ഇതു സംബന്ധിച്ച് ഉത്തരവിറക്കിയത്. മൊത്തം ഇരുപതോളം ഐഎഎസ് പരിശീല സ്ഥാപനങ്ങൾക്ക് സിസിപിഎ നോട്ടീസ് അയച്ചിട്ടുണ്ട്. ചാഹൽ അക്കാദമി, ഐക്യൂആർഎ ഐഎഎസ്, റാവൂസ് ഐഎഎസ് സ്റ്റഡി സർക്കിൾ, അൺകാഡമി ഐഎഎസ് എന്നീ സ്ഥാപനങ്ങൾക്കാണ് ഒരു ലക്ഷം രൂപ വീതം പിഴ ചുമത്തിയത്.